Chie si nd’intendet l’ischit: in Sardigna s’energia no est un’apretu, ca nde produimus meda de prus de cussu chi nos serbit. Est beru però chi chie la produit inoghe nos la bendet a prètzios artos e como, cun sos problemas de custos mese, su gastu pro famìllias e aziendas est fintzas crèschidu. Pro esempru, sa Confcummèrtziu at iscumproadu chi sas butegas — mescamente sos furros, chie faghet a manigare e sos mastru de linna — ant pagadu su 75% in prus de s’annu coladu.
No est tando unu problema de produtzione, bi nd’at de prus de su chi nos bisòngiat, ma de distributzione e de chie la faghet. Pro custu comitados de Bitzi non cherent palas eòlicas in cussos tretos: su balàngiu pro su territòriu est prus minore de su pagu dinari chi podet intrare in sas butzacas de pagos meres. Produire energia ma no la dare a sa populatzione de sa zona, chi però sufrit s’isfrutamentu de sa terra, est chistione de economia coloniale.
De solutziones non nde mancant. Sa CNA Sardigna, pro esempru, at pedidu a sa Regione de agiudare sas aziendas a pònnere sos pannellos solares pro minimare sos gastos de sas bulletas chi in pagu tempus podent fàghere tancare impresas sardas maicantas. Ma pro isòrvere su problema si podet sighire puru su surcu sinnadu dae Mauritziu Onnis, sìndigu de Biddanoa de Forru, chi at fraigadu in sos annos una comunidade energètica, chi est unu modellu pro s’Istadu intreu. Sa Regione però, at seberadu de finantziare cust’àndala cun bator millione ebbia.
(redatzione)
Leave a comment