Sàtira, gràfica e goliardia in Tàtari.

Sàtira, gràfica e goliardia in Tàtari.

Dae sa fine de su sèculu XIX finas a sos annos ‘20 de su de binti in Tàtari, ma prus in generale in totu sa Sardigna, fiant nàschidos giornales umorìsticos, caraterizados dae s’impreu de figureddas caricaturales.

In custas rivistas iscriiant autores protagonistas de sa vida culturale de sa tzitade, che a Pompeo Calvia, su poete, e Enrico Costa, s’istòricu.

Su sòtziu culturale Aristeo, in collaboratzione cun sa Biblioteca Universitària de Tàtari, at dedicadu una mustra, cuncordada dae Simonetta Castia e Stefano Serio, a custu movimentu literàriu, intitulada Mastica brodo Papè Satàn… e abbozza!

Est sa sighidura ideale de Testate d’autore, espositzione organizada in su 2014, semper in Tàtari, in su palatzu de sa Frumentaria.

Sa mustra cheret èssere un’ammentu e omenàgiu a sa creatividade de cuddu tempus, a distintu de rivistas che a Il Burchiello (1901-1905), Massinelli (1900-1905), Pantagruel (1904) e Falstaff (1903).

In sos annos ‘20 ddoe fiat istada una crèschida de publicatziones goliàrdicas, produidas dae istudiantes litzeales e universitàrios: La Foglia di fico, Buffami l’occhio, Esci da sotto, E… abbozza, Siedimi in barca, La Voce dei battistrada, Ponibi un zappulu, Gatt’a terra, Kilippodromo…

Ateruna rivista connota meda in sos annos ‘20 fiat La Gaita, de Antonino Saba.

In su pianu terra de sa Biblioteca sunt espostas sas figureddas e sos originales de una barantina de giornales. In su primu pianu imbetzes si dat ispàtziu a sa parte gràfica ebbia cun sas caricaturas.

Intre sos personàgios immortalados in tinta e pabiru ddoe sunt Enrico Costa, Pompeo Calvia, Salvator Ruju, chi aiat fundadu Il Burchiello, e Enrico Berlinguer, co-fundadore, in su 1891, de La Nuova Sardegna.

Sa mustra, patrotzinada dae sa Regione Autònoma de Sardigna, dae sa Comuna de Tàtari e dae sa Fondazione di Sardegna, est istada inaugurada su 18 de làmpadas e at a abarrare aberta finas a su 24 de cabudanni. Pro informatziones si podet telefonare a su nùmeru 3397760176.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *