Finamentas s’Itàlia est incumintzende a pensare de pònnere règulas a sas aziendas mannas de internet. Lega, PD e Noi moderati ant presentadu tres propostas de lege chi punnant a non fàghere intrare in sos social sos adolescentes e sos pitzinneddos. Sas diferèntzias sunt a subra de sas maneras: chie est pro una proibida tètera, ma nudda de prus e chie proat a aprontare unu sistema de amparu prus mannu.
Sos datos europeos ponent meledos: oto persones de deghe, intre trèighi e deghessete annos, cumpudant su telefoneddu nessi una borta a s’ora. A su 25% de sos pitzinnos a suta de degheoto annos lis est bènnida una dipendèntzia pro su tzellulare. E s’iscèntzia at fatu essire a campu chi un’impreu gasi fitianu faghet bènnere problemas de atentu e fintzas de depressione, mescamente ca andat a pilisare su sistema dopaminèrgicu de sas mentes giòvanas.
Su problema est chi como sa responsabilidades de decrarare s’edade est de chie impitat sa prataforma, fàghere una lege chi àrtziat s’edade, ma non càmbiat custu passàgiu no at fortza: bisòngiat chi siat chie frunit su servìtziu a tènnere sa responsabilidade de acrarire custu datu.
Barigadu custu istorbu bisòngiat de otènnere unu controllu de sos contenutos, a manera chi sas retzas sotziale siant unu logu prus sanu pro mannos e minores, mescamente pro su chi pertocat sos algoritmos e sos mecanismos de colada dae unu post a s’àteru. Sena custu passàgiu custos logos digitales ant a leare un’aèrzu de trasgressione, una manera pro los fàghere disigiare de prus a sos adolescentes. In paris cun custa mòvida, bisòngiat de ammanigiare cursos de educatzione digitales, pro sos giòvanos e pro sos mannos.
Est craru chi andare a sa sola, non tenet sensu perunu. S’Itàlia est tropu dèbile, e difatis est andende paris cun sas istitutziones europeas. S’apretu est cumpartzidu e, difatis, sa Cummissione europea est in bidea de presentare su Digital Fairness Act ocannu etotu: una lege chi at a proare a pònnere règulas a subra de sos influencer, sas trassas e sos produtos digitales fraigados pro pesare dipendèntzia.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment