Oe, isetada dae gente meda, est lòmpida sa sentèntzia de su TAR a subra de sa cuntierra de Sa Regione contra a s’Istadu italianu pro su sèberu de pònnere sa Sardigna in sa zona arantzu. Su giùighe, Dante D’Alessio, at dadu resone a su guvernu ca pro bator elementos s’ìsula fiat de a beru peorada: sa pertzentuale de letos ocupados in sas terapias intensivas, su nùmeru de sos casos ativos cada chentu mìgia abitantes, s’andòngiu de sos focolajos e sa lestresa de sa trasmitida de sos datos e sa cumpletesa issoro.
Su TAR narat fintzas chi su sèberu naschet da unu “sistema automatico e gestito da un algoritmo” e chi a pustis chi s’intrat in una zona cun unu colore prus iscuru de su grogu, bisòngiat de isetare nessi duas chidas pro nde essire, duas chidas chi depent ammustrare chi sos livellos de su Covid sunt megiorende arreu. S’ùnica manera pro nde essire prima est proare chi sos datos imbiados giughiant una faddina, comente est capitadu a sa Lombardia dae pagu. Su chi narat su giùighe est chi sos datos benint postos in unu programma, est issu chi càrculat cale colore depet tènnere una regione, e tando non est unu sèberu polìticu ma sa cunseguèntzia de su chi est capitadu in cussa chida e de sos datos imbiados. In prus su giùighe at reconnòschidu chi sas resones sanitàrias amparadas dae su guvernu benint prima de cale si siat àteras resones.
Su Presidente Solinas at giai rispostu a sa sentèntzia narende chi su sèberu naschet dae una “valutazione discrezionale ed immotivata degli organi tecnici” e chi sas resones de sa Sardigna siant prus de importu de cussas petzi tècnicas e “fariseas” de su Ministèriu. At annantu chi però est cuntentu de àere batalliadu pro su bene de sa Sardigna.
(redatzione)
Leave a comment