Sas peleas de Beniaminu e sos tortìghines de sa giustìtzia

             Sas acuntèssidas de  Beniaminu Zuncheddu, su pastore de Burcei chi s’at coladu    in presone belle 33 annos sende innotzente, at cummòvidu e impressionadu a totus. Comente est istadu possìbile  chi un’òmine sugetu  a indàgines giuditziàrias,  coladu in totu  sos grados de giudìtziu prevìdidos dae s’ordinamentu e cundennadu in manera definitiva a s’ergàstulu, l’apant reconnotu innotzente a pustis de tantos annos?

         Custa istòria paradossale est istada, pro sos avocados nugoresos, s’ocasione  pro abèrrere un’aprofundimentu  professionale.  Sa Càmera penale de  Nùgoro at amaniadu un’addòviu pro nde faeddare.  Su tìtulu fiat “Sa revisione de su  protzessu penale intre su dogma de sa seguresa de sa cundenna e su dramma de sa faddina giuditziària: s’acuntèssida de Beniaminu Zuncheddu”.

        In s’addòviu ant leadu parte finas sos giornalistas. S’argumentu, a sas beras,  interessat in manera direta  finas a issos, ca cada die  contant  istòrias, finas drammàticas, chi pertocant sa crònaca giuditziària, in ue a bortas sas primas impressiones  si podet iscobèrrere chi sunt isballadas, finas a lòmpere a faddinas giuditziàrias  estremorosas, che a sa chi  at còrfidu a  Beniaminu Zuncheddu.

        A pustis de s’istèrrida  de  s’avocada Paola Marteddu, vitzepresidenta de sa Càmera penale de Nùgoro e sos saludos de s’avocadu Lorenzo Soro, presidente de s’Òrdine de sos avocados de Nùgoro, e de Francesco Birocchi, presidente de s’Òrdine de sos giornalistas de Sardigna, sunt intervènnidos sos avocados Basilio Brodu, giai presidente de s’Òrdine professionale de Nùgoro e Mauro Trogu, presidente de s’Aiga, setzione de Casteddu. At moderadu s’avocadu Giovanni Angelo Colli, presidente de sa Càmera penale de Nùgoro. Assente giustificadu, Beniaminu Zuncheddu: su biàgiu dae Burcei a Nùgoro, cun tantos chilòmetros de curvas, non fiat cumpatìbile cun   sas cunditziones suas de salude.

        A s’ex pastore, chi como tenet  59 anni, l’aiant incurpadu de su chi li narant “s’abbasatu de  Sinnai”, cun tres pastores mortos e su de bator fertu in manera grave. L’aiant arrestadu s’8 de ghennàrgiu de su 1991 e pro issu est cumintzada una via crucis giuditziària terrorosa, intre fàulas, iscaminamentu de proas, torròngios in palas in sas decraratziones e testimonias farsas, finas a sa condenna a s’ergàstulu. A pustis de  32 annos, gràtzias  a su traballu de s’avocadu Mauro Trogu e a sa sensibilidade de unos cantos magistrados, est arribbada sa revisione de su protzessu chi s’est congruida cun sa sentèntzia assolutòria.

           In s’addòviu s’avocadu Brodu at craridu  sos mecanismos legales chi règulant s’istitutu de sa revisione de su protzessu, cando chi s’avocadu  Trogu at contadu su caminu longu e percossosu  chi nch’at giutu a s’assolutzione.

          Ma, ite narat como Beniaminu? Issu narat chi cheret sa beridade. E sa beridade  la sunt chirchende sos incuirentes, ca b’at indàgines noas pro iscobèrrere chie sunt istados a beru sos mortores.

(sa redatzione)

Leave a comment