Martis 17 de làmpadas in su teatru Astra de Tàtari ddo’at àpidu un’ispetàculu musicale pro presentare su discu Le musiche di Simon Mossa.
Sa pianista Antonella Chironi e s’Orchestra D’archi Glareano ant sonadu sos cumponimentos de su polìticu sardista, mortu in su 1971.
Intelletuale polièdricu, architetu cun interessos pro su tzìnema e sas limbas sarda e aligheresa, chi nos at lassadu poesias e tradutziones, Simon Mossa teniat finas una passione musicale chi in custs ùrtimos annos, pro more de sa collaboratzione intre su fìgiu Pietro, su maistru Battista Giordano e s’Istitutu Bellieni, s’est cuncretizada ponende in unu cd su chi fiat abarradu iscritos in notas a subra de ispartitos.
A cumpletare su discu una poesia de Micheli Pinna, Dimandas, posta in mùsica dae Beppe Dettori, chi dd’at eseguida in teatru paris cun su maistru Giordano e s’acumpangiamentu corèuticu de Sara Giordanelli.
Ant introduidu sos protagonistas e saludadu su pùblicu Daniela Masia e Dolores Lai de s’Istitutu Bellieni.
(gm)
Leave a comment