In custas dies sos USA si sunt impinnados pro nde bogare dae s’Iran unu pilota issoro de aèreu chi fiat rutu in su terrinu inimigu, a pustis de èssere istadu corfadu dae sa contraèrea de sa Repùblica islàmica. In prus sas operatziones de recùberu lis sunt costadas duos aèreos MC130J e bator elicòteros “Little Bird”, ma nemmancu una vìtima. Cust’acontèssida nos narat chi sa capatzidade iraniana de si defensare e de atacare sos istadunidensos no l’ant minimada comente sunt narende e chi, tando, sos perìgulos de sa zona e sa gherra podet fintzas durare maicantu, fatende pigare su prètziu de sos carburante e de s’energia.
Bidende s’andanta, carchi Istadu europeu si est moende cun sa diplomatzia pro isòrvere su problema de s’àidu de Hormuz, nessi pro issos. Sa Frantza e su Giapone ant fatu colare duas petrolieras issoro, e est dàbile chi l’ant fatu pro more de acordos o ca ant pagadu s’Iran. S’imprenta at documentadu fintzas àteras coladas pagu craras de àteros nàvios ispanniolos non cunfirmadas dae nemos. Su passu est importante meda in unu caminu de solobradura de sas alleàntzias betzas: dae su fritu pro sa gherra de Israele e USA, passende pro denegare bases e chelu a sos aèreos de Trump e a refudare de intrare in batalla, como s’est lompende a tratare cun sos inimigos.
Fintzas Giorgia Meloni, chi dae semper est istada a curtzu de su Presidente USA, at inghitzadu a faeddare cun sos Regnos àrabos de su Gulfu pro agatare una manera de barigare sa crisi istesiende s’Itàlia dae su fogu de sas armas. Est sa prima ghia de guvernu europeu a fàghere unu biàgiu gasi e non s’ischit galu cal’est sa punna sua. Forsis una proa pro chietare a iranianos e americanos, o forsis s’idea est cussa de pedire su permissu a sos àrabos pro arresonare a sos iranianos.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment