Lunis 14 de abrile su parlamentu de sas ìsulas Maldivas at cunvèrtidu in lege su de tres emendamentos de sa normativa pro s’immigratzione, chertu dae su guvernu, chi proibit s’intrada a s’artzipèlagu a sos tzitadinos israelianos. Sa die in fatu est arribada s’aprovatzione de su presidente Mohamed Muizzu.
S’iter legislativu fiat cumintzadu ocannu passadu ma custas dies ebbia est lòmpidu a concrusione.
Su provedimentu no at a bàlere pro chie, in possessu de unu passaportu israelianu, nde tenet aterunu de ateruna natzionalidade.
S’ufìtziu de presidèntzia at decraradu ca «sa ratìfica est cunforma a sa positzione firma de su guvernu in risposta a sas crudelidades sighidas e a sos atos de genotzìdiu in cursu cummìtidos dae Israele contra a su pòpulu palestinesu».
In prus su presidente pedit chi siat reconnota s’esistèntzia de un’istadu de Palestina, cun sas làcanas de in antis de su 1967 e cun capitale Gerusalemme Est.
Est duncas una mesura leada comente ritorsione pro sos bombardamentos de s’istrìscia de Gaza dae parte de s’esèrtzitu cun s’isteddu de Davide e unu signale de solidariedade pro sas vìtimas de custas atziones militares.
Giai in su mese de santandria de ocannu coladu su presidente Muizzu aiat pedidu a sa comunidade internatzionale de impreare su podere econòmicu e polìticu pro firmare su chi definit su genotzìdiu contra a sos palestinesos.
Sas ìsulas Maldivas sunt unu paisu de religione musulmana e su provedimentu cheret incuadradu in su clima de arrennegu de su mundu islàmicu pro su cunflitu in Terrasanta.
Una prima risposta, non polìtica ma militare, est istada sa de sos Huti de su Yemen. Su grupu, musulmanu sciita, est atachende dae prus de un’annu naves cummertziales ma finas de sa marina americana, blochende duncas su tràficu in su Mare Ruju, comente risposta a sos atacos contra a sos palestinesos e contra a Hamas.
(gianni muroni)
Leave a comment