Gràfica leada dae su situ de sa FAZ
Sas eletziones tedescas de su 23 de freàrgiu ant mustradu in manera crara chi ddo’at duas Germànias. Mentras in sa ex Germània Otzidentale ant bintu cristianodemocràticos e cristianosotziales, cun giassos a majoria sotzialdemocràtica e, prus pagu, birde, in sa ex Germània Orientale at dominadu Alternative für Deutschland, su partidu de destra nàschidu in su 2013.
S’unificatzione de sos duos istados no at batidu sos resurtados isperados. Sas cunditziones econòmicas in sa parte orientale sunt prus malas de s’ovest, neghe finas de unu passàgiu mancari tropu lestru e sena de mediatziones dae unu sistema sotzialista a unu de mercadu lìberu, chi at cajonadu iscuntzertos in s’istrutura sotziale de sos länder de s’est.
Pro fàghere un’esèmpiu, in sa prima sèrie de su campionadu de fùbalu ddo’at un’iscuadra ebbia de sa ex DDR, s’Union Berlinu. Sos àteros club istòricos s’agatant in sas categorias inferiores, signale, custu puru, de un’integratzione fallida.
A pustis chi nd’aiant ghetadu su muru de Berlinu sos tedescos orientales ant bìvidu, passada s’allegria de sos primos tempos, su fenòmenu de sa Ostalgie, est a nàrrere una nostalgia pro s’istadu de in antis, antidemocràticu ma chi a su matessi tempus garantiat cunditziones de vida dignitosas a totu sa populatzione. Como, in custos ùrtimos annos, neghe de s’immigratzione de massa, su baritzentru polìticu s’est mòvidu imbetzes a destra.
A istesiare de pare sas duas Germànias ddo’at finas un’efetu paradossale de sa ex Repùblica Democràtica Tedesca, est a nàrrere chi sa ditadura comunista a unu chirru at privadu sos tzitadinos suos de sa libertade, a s’àteru però at mantènnidu in vida mentalidade e costumàntzias tedescas, mentras s’ovest a sa fine de sos annos ‘80 fiat giai totu americanizadu, che a su restu de s’Europa otzidentale.
Su malèssere de sos tedescos de s’est pro sas polìticas natzionales, chi s’est espressadu cun custu votu de gasi diferente dae su restu de s’istadu, tenet duncas motivatziones econòmicas e sotziales chi sos partidos traditzionales no ant ischidu cumprèndere.
(gianni muroni)
Leave a comment