Lunis su referendum l’at bìnchidu su Nono, chi at barigadu a su “Sì” de belle oto puntos pertzentuales. Chie at sustènnidu de prus custu sèberu sunt istados sos giòvanos a suta de sos barant’annos e su Sud. Sa Sardigna est istada sa regione de bator pro sa cantidade de votos chi ant favorèssidu su Nono, cun su 59,4%, cun totu cantas sas tzitades prus mannas de s’ìsula chi ant detzisu de refudare sa riforma de sa Giustìtzia.
Sa pèrdida est istada unu corfu malu pro sa Presidente de su Cussìgiu de sos Ministros, Giorgia Meloni, chi aiat s’ispera de ammustrare galu una fortza manna in sos cunsensos, capatze de fàghere bìvere, a issa e a sa majoria sua, sos meses a dae in antis de sas eletziones a manera sulena. Cando at cumpresu chi sa situatzione fiat andende male, at proadu a s’impinnare de prus andende in totu sos programmas chi podiat, e dende s’impèllida a sos suos de fàghere su matessi. Ma custa mòvida est istada peus, mescamente pro sos chi lis istaiant prus a curtzu, chi ant faddidu sos messàgios, su tonu e ant fatu pèrdere votos.
Tando, como, Meloni est pedende dimissiones e proende a mudare de unu pagu s’aèrgiu de su guvernu. E gasi eris si nch’est dimìtida Giusi Bartolozzi, ghia de su gabinetu, mutida intro de su Ministèriu de sa Giustìtzia sa zarina, ca aiat leadu unu poderiu gosi mannu chi aiat fatu fuire responsàbiles maicantos e chi ghiaiat ufìtzios dìligos a manera fidele e tètera. Issa, però, aiat naradu a craru chi sa lege fiat pro si nche bogare dae mesu sos magistrados, e custas paràulas aiant assuconadu s’opinione pùblica.
Àtera conca chi ruet est Andrea Delmastro, sutasegretàriu de sa Giustìtzia. Amigu corale de sa Presidente chi l’aiat amparadu cando l’aiant cundennadu pro àere imbiadu intertzetatziones segretas de Alfredo Cospito a unu cumpàngiu de partidu e fintzas cando in una festa in ue bi fiat isse aiant isparadu a un’òmine cun una pistola de Emanuele Pozzolo, de Fratelli d’Italia isse puru. Como Delmastro est intro de unu protzessu a subra de unu ristorante abertu in paris cun una pitzinna, fìgia de un’òmine de sa camorra. Tres acontèssidas graes, ma chi fintzas a eris non lis aiant fatu pèrdere nen fide nen cadrea. Giorgia Meloni cheret fintzas sas dimissiones de Daniela Santanché, famada in custos annos pro àere carchi protzessos abertos a subra de sas aziendas suas.
Est craru chi Meloni est in bidea de otènnere torra credibilidade, ma s’impressione chi est colada in custa campagna eletorale est istada cussa de una Presidente assolada e inghiriada de gente de pagu gabbale.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment