de Antonimaria Pala
In chimb’annos apo bidu s’isperimentatzione de su sardu veicolare in oràriu curriculare. Apo finas intesu chi est andada bene e difatis sa giunta chi bi fiat in antis de custa chi b’est como, nche at batidu su finantziamentu dae sos 50.000 € chi aiat postu s’àteru presidente su primu annu, a 450.000 € in s’annualidade 2013. Bene meda.
Làstima chi fortzis pro un’amnesia mamentànea pro su 2014, annu iscolàsticu 2014-2015, custa giunta no at postu mancu francu in custa atividade. Deo, essende assesore o presidente de sa regione, capitende mi de fàghere un’ismèntigu che a custu, mi nche fia recuidu a domo e mi fia postu a prantare s’ortu chi luego est tempus de curcuriga. S’ortalitzia faghet bene meda a sa carena e a sa conca.
Su sardu in iscola est una rivolutzione comente at naradu unu ex diretore de su Servìtziu Linguìsticu Sardu. Chi siant manizos de contrarivolutzione? Non creo, ca bi cheret passione e capatzidade finas pro fàghere cussa, mancari siat contra a sa natzione nostra, o Regione comente li mutint cun resone.
No apo duda peruna, chi sos chi cherent s’afortimentu e s’ufitzialidade de sa limba natzionale movende dae s’iscola, non si nche ant abarrare cun sas manos in manos. Sunt medas finas cussos chi bi traballant, cun sa limba.
Ma mi paret finas giustu chi cando si cambiat gestione tochet de impreare unu punzu de discontinuidade. E custa borta su punzu (mancu?) est de KO. Chie at a èssere s’allenadore de custos pesos puma?