Sa Sardigna ponet fronte a una crisi sanitària mai bida a primu: mancant a s’apellu 495 dutores de meighina generale. Su datu nd’essit a pìgiu dae sa lista de sas sedes bòidas, publicada dae s’Assessoradu regionale de sa Sanidade pro pedire candidaduras noas. Sa situatzione prus crìtica est cussa de sa Asl de Casteddu, cun 150 postos iscobertos, de custos 69 in sa tzitade printzipale e in sos oros a curtzu. Sighint Tàtari cun 101 mèigos chi mancant; Nùgoro cun 66 sedes bòidas; Aristanis chi tenet 64 postos iscobertos; Campidanu de Mesania e Gaddura cun 36 mèigos chi mancant in su primu e 35 in sa segunda; Sulcis e Ogiastra ant 31 e 11 sedes de cunfirmare.
A custa farta si annanghet su bòidu lassadu dae s’emergentzia sanitària territoriale: in totu s’ìsula si chircant 73 dutores pro sos turnos. Sa mancàntzia de operadores sanitàrios in su territòriu ispinghet sa gènte a tucare a sos ispidales, ponende in tilt sos Prontu Sucursos. In su 2025 s’ant registradu 470 mìgias intradas in totu. Sos datos essidos a pìgiu in sa Commissione Sanidade sunt allarmantes.
In su Brotzu (Casteddu) b’at àpidu prus de 65 mìgias intradas, cunsiderende mannos e minores. Su 26 pro chentu acabat cun unu ricòveru, batende tropu gente in totus sos repartos. Còdighes Biancos e Birdes si nd’agatant finas a su 70 pro chentu in sas intradas a su Policlìnicu Universitàriu de Casteddu, sinnu ladinu chi sos tzitadinos non retzint respustas dae sa meighina territoriale o dae sas guàrdias mèigas issoro.
Su sistema de emergèntzia-urgèntzia est garantidu oe dae mèigos a getone, chi però tenent sos cuntratos in iscadentzia. Medas de custos si serrant intro a su 30 de làmpadas. S’arriscu pràticu, denuntziadu fintzas in sede polìtica, est sa serrada de prus presìdios in sos ispidales. Sos dirigentes sanitàrios e s’Areus sunt de acordu: sena afortigare sos territòrios sa pressione in sos ispidales at a èssere mala a suportare.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment