Sardigna: s’autonomia diferentziada chi nemos cheret.

de Salvatore Serra

Oramai non si faeddat prus de sa cuntierra de sas intradas ( “vertenza entrate”). Paret colada de moda. Làstima, ca, a aplicare s’art. 8 de su Tìtulu III de s’Istatutu diat èssere de profetu pro s’economia. Difatis, diat permìtere a sa Sardigna de tratènnere su bonu de sas tassas, intreghende·nde una parte ebbia a s’Istadu. Ma, ite narat custu art. 8?. Lu bidimus como

………………………………………………..

LEGE COSTITUTZIONALE de su 26 de freàrgiu de su 1948, n. 3

Istatutu ispetziale pro  sa Sardigna.

 

 

Art. 8.

 

Sas  intradas  de sa regione sunt  formadas:

1. a) dae su deghe-sete (7/10)   de sos ingressos fiscales  de sas tassas  subra de sas intradas  de sas  pessones   fìsicas  e subra de sas intradas de sas pessones  giurìdicas coberadas in su territòriu de sa regione;
2. b) dae  su deghe noe  (9/10) de sos ingressos fiscales  de sas tassas  subra de su bullu, de registru,  ipotecàrias,  subra de su   cunsumu  de s’energia  elètrica e de sas tassas  subra de sas cuntzessiones   guvernativas  coberadas in su territòriu de sa regione;
3. c) dae su  deghe/chimbe (5/10) de sas tassas  subra de sas  sutzessiones e donatziones coberadas in su  territòriu de sa regione;
4. d) dae su   deghe/noe (9/10)  de sa tassa  de  manifatura subra de totu  sos produtos  chi nde siant  gravados, coberada in su territòriu de sa regione;
5. e) dae su   deghe/noe (9/10) de sa cuota fiscale de sa tassa erariale de cunsumu  relativa  a sos   produtos   de su   monopòliu de su tabacu cunsumados in sa  regione;
6. f) dae su   deghe/noe (9/10) de s’intrada de sa tassa  subra de su  balore annantu generada  in su  territòriu regionale,  de  determinare  tenende contu  de sos  cunsumos regionales de sas famìlias  registrados  cada annu dae s’ISTAT;
7. g) dae sas tarifas  pro sas cuntzessiones  idroelètricas;
8. h) dae sas   tassas  subra de su turismu  e dae àteros  tributos pròpios chi sa   regione  tenet facultade   de  istituire  cun  sa lege, de acordu  cun sos printzìpios de su  sistema tributàriu de s’Istadu;
9. i) dae sas intradas  chi protzedint  dae su patrimòniu suo  e dae su domàniu suo;
10. l) dae  cuntributos istraordinàrios  de s’Istadu pro disinnos  particulares  de òperas pùblicas e de trasformatzione fundiària;
11. m) dae su deghe – sete  (7/10) de totu   sas intradas  erariales, diretas o indiretas,  in cale si siat manera  denominadas, francu sas chi tocant a  àteros entes pùblicos.

In sas   intradas   chi tocant a  sa  regione sunt inclùdidas  finas sas chi,  mancari relativas  a fatispètzies tributàrias  acumpridas  in su cuntestu regionale,  afluint,  in aplicatzione de disponimentos legislativos o pro  esigèntzias  amministrativas, a  ufìtzios  finantziàrios  chi s’agatant in foras  de su territòriu de sa regione.

Leave a comment