S’abba chi est falende in custos meses est gasi meda chi in zonas de Sardigna sos sartos sunt totus a unu paule. Su terrinu s’est isorvende e sunt benende a subra totus sos problemas de comente sunt istadas fraigadas sas istradas de s’ìsula nostra.
Sa 131 in sa parte de Tàtari tenet tretos tancados o cun un’asfaltu chi s’est solobrende e como est falada fintzas un’àtera parte a probe de Bonorva. E sa parte de Casteddu, chi est unu pagu prus contivigiada, tenet issa puru problemas. Como sa Regione e sas Provìntzias sunt pedende a s’ANAS de pònnere manu a sas carreras prus de importu de Sardigna e amus a bìdere ite nde essit.
Dae su chi est bessende dae sos programmas a subra de sos investimentos in infrastruturas in Sardigna, de su dinare de su Recovery fund si cheret pònnere carchi cosa pro agabbare progetos giai abertos, ma de mannu, pagu de su chi nos abisòngiat. Forsis petzi un’istrada chi colleghet s’Ogiastra cun su de Aristanis.
Si bi annanghimus su disamparu chi sos aeroportos sunt sufrende pro neghe de su Covid; sa Tirrenia chi cheret semper menguare sos biàgios cun sos navios e sos trenos chi andant galu a disel, podimus nàrrere chi paret chi sa Sardigna non faghet parte de s’Istadu italianu, ca est difìtzile puru a bi lòmpere a Itàlia oramai.
Sa crisi de su Covid est fatende essire a campu su puntu malu in ue est sa Sardigna. Economia forte in manos angenas e sa de su logu tropu dèbile, giòvanos fuende, pitzinnos chi non naschent prus, iscolas bòidas cun unu tassu de disamparu de sos prus artos, cultura sarda disconnota, sanidade isciusciada dae dereta e manca. E custos non sunt chistiones ligadas a sa maladia, ma chi su virus corona at petzi peoradu e chi s’abba est unfrende.
Su Covid paret chi cust’annu podet agabbare, su chi non depimus fàghere est pensare chi sos problemas betzos si nde andent cun issu. Su fràigu chi depimus inghitzare no est gasi simpre comente torrare in dae segus, a su connotu, ma artziare sa conca e andare a dae in antis.
Gabriele Tanda
Leave a comment