Sa Sardigna si mantenet arba, ma su ruju minetzat de lòmpere a bellu a bellu. Su arbu l’amus conchistadu cun isfortzos medas e cun duas chidas de arantzu chi ant fertu in manera mala s’economia sarda, chi no est chi fiat posta gasi bene. Como gente medas tenent timoria chi sa situatzione potzat peorare, e non pro neghe sua.
Sas minetzas suprint dae s’Itàlia belle totu ruja: s’Istadu at seberadu de non firmare a sos chi cherent bènnere a Sardigna pro sas sigundas domos. E giai dae eris sunt lompende noas de gente chi est falende dae sos navios e dae sos aèreos e chi non cheret sighire sas medidas de sa Regione (inoghe s’artìculu chi nde faeddat), difatis custas non sunt òbligos, ma petzi cussìgios.
De tampones in sos portos e aeroportos giai non nde mancat e sos chi los faghent fàghere puru, ma su chi non si podet fàghere est a custrìnghere a sos chi benint, e chi no ant perunu documentu, a si fàghere compidare. Sas ùnicas duas possibilidades de arressare sa gente malàida diant èssere o s’òbligu de s’anàlisi (chi però no est dàbbile), o sa serrada de sas làcanas de s’ìsula comente at giai fatu sa Badde de Aosta. Custu sèberu lu cheret gente meda e sa pregunta l’ant giai fata dae belle totus sos partidos indipendentistas sardos. Est craru chi sa batalla no est contra a sos chi benint dae fora, ma contra a su fatu chi custos non si podent compidare comente si tocat.
Su chi ponet prus fele est chi s’aberit a sos terramannesos sena s’òbligu de compidada, cando abarrant tancadas atividades sardas comente palestras, piscinas e iscolas de ballu. Unu setore ammanigiadu dae gente chi bivet semper in Sardigna e chi in Sardigna gastat su prus de su dinari balangiadu.
Barant’annos a como essiat unu romanzu de Zuanne Frantziscu Pintore, Sardigna ruja (torra sos colores), chi, intre àteros, poniat dudas a subra de sa polìtica e s’imprenta sarda chi aiat ammanigiadu su pranu de “Rinascita”: persones colonizadas e dipendentes dae sos inditos chi beniant dae foras. In sos cunfrontos de oe, isperant in medas, àteros tempos, ma como pro Solinas est su momentu de lu proare. O ite cherimus, acostiare una Giunta regionale sardista a cussa genia de polìticos?
(redatzione)
Leave a comment