de Salvatore Serra
Marisa Solinas (Gènova, 30 de maju de su 1939 – Marino, 13 de freàrgiu de su 2019) est istada un’atora e cantadora chi at tentu su mamentu prus mannu de notoriedade in sos annos 60 e 70. Fìgia de unu sardu e de una toscana, at bintu, in issa, s’ànima sarda. E no est de badas chi, pagos annos in antis de sa dispedida, su Grèmiu l’at cherta in sa rassinna “Incontri con il cinema sardo”, e su giassu digitale chi nde faeddaiat poniat su tìtulu “La Sardegna nel grande schermo”. In su matessi tempus issa essiat a foras dae totu sos istereòtipos de un’ indentitarismu presoneri de ischemas antigòrios, mustrendeˑsi trasgressiva e atrivida.
Issa fiat una bellesa rara, cun una carena minuda ma perfeta. Calicunu la paragonaiat a Elizabeth Taylor e a Audrey Hepburn: de seguru, pensende a sos ogros suos incantadores, a sos pilos longos e nieddos e a sa cara galana de pupia, non si podet nàrrere chi esageraiant.
Marisa Solinas non fiat atora e cantadora ebbia, ma finas modella, protagonista de servìtzios fotograficos pro chentinas de revistas de totu su mundu (non si faghiat problemas a si mustrare nuda, chi esseret in sa cobertedda de Playmen o in su libru fotogràficu de Gina Lollobrigida) e protagonista de sos fotoromanzos in s’istajone de oro intre sos annos 50 e 60. Meda ativa finas a pustis, at leadu parte in pellìculas, iscenegiados e rapresentatziones teatrales cun sos mègius registas e sos mègius atores e atoras internatzionales.
Su cumintzu in su tzìnema b’est istadu cun su regista Mario Monicelli, chi in su 1962 l’at fata retzitare comente protagonista in s’episòdiu “Renzo e Luciana” de sa pellìcula “Boccaccio ’70,” segmentu fìlmicu chi pertocaiat su contu de amore turmentadu de duos giòvanos chi traballaiant in un’azienda manna, postos in anneu dae sas cunventziones sotziales in su tempus de su “miràculu econòmicu”.
Pustis at interpretadu pellìculas de su gènere chi li naraiant “musicarello” (comente “Riderà” (Cuore matto), in pare a Little Tony, leadu dae sa cantzone omònima) e pellìculas de pagu calidade, ma finas traballos de nivellu bonu in su campu de sa cummèdia a s’italiana (“Viaggio di nozze all’italiana”, de su 1966, “L’arbitro”, de su 1974, “Tutti dentro” e “I due carabinieri”, de su 1984).
Sceti in su 1964 at cumintzadu a fàghere sa cantadora cun “Devi imparare”, cantzone dae ue ant fatu finas unu filmadu chi ispàrghinaiant in su giru de sos tzinebox. Interpretaiat e pùblicaiat pro “La Voce del Padrone”, sa “CDB” e àteras sotziedades minores cantzones comente solista o in pare cun àteros cantadores e atores, comente Andrea Giordana. Aiat fatu iscàndalu, in sos annos 70, a un’ala, s’interpretatzione sua de sa cantzone “L’estasi” , – un’ istròchidu de “ Je t’aime… moi non plus”, chi si b’assimìgiaiat finas in sa melodia, cun referimentos craros a s’erotismu – iscrita dae Elvio Monti e Armando Stula (chi pustis at a èssere su maridu de sa sorre Vittoria) e cantada in pare a Giordana, a s’àtera, “Amo sentirvi”, fatu in pare a sa sorre e a Stula (in sa cobertedda de su discu sos tres sunt nudos a mesu bustu); in sos annos 70, un’àtera cantzone trasgressiva e dissacradora, in ue interpretaiat una mòngia turbada dae sas tentatziones, est “Vai suora vai”.
In su 1981 at fatu finas teatru, interpretende sa parte de sa mama in “ Il Pellicano” de August Strindberg, diretu dae su maistru Lorenzo Cicero. S’ispetaculu l’ant realizadu in collaboratzione cun s’Ambasciada de Isvètzia in Roma.
In sos annos 90 at tentu incàrrigos de importu in s’IMAIE (s’assòtziu chi tutelat sos artistas de s’ispetàculu).
In su 2009 at publicadu un’album, intituladu “Venerefenice – Retrospettiva”, in ue b’at unas cantas intzisiones de su tempus coladu e carchi inèditu, in mesu de sos cales unu misturu de cantzones (“Smile” de Charlie Chaplin, “Cabaret”, “Amado mio” e àteras) eseguidas cun s’acumpangiamentu a su pianoforte de su maistru Elvio Monti.
In su 2014 su Grèmiu, assòtziu culturale de sos sardos, in ocasione de su de 65 anniversàrios de sa fundatzione, cun sa collaboratzione de sa Fasi (Federatzione de sos assòtzios sardos in Itàlia), de sa Tzineteca Sarda – Sotziedade Umanitària e de sa “Cineteca Nazionale”, at ammaniadu una sèrie de projetziones e dibàtidos cun atores e registas, in intro de sa rassinna “Incontro con il Cinema Sardo”, in su Tzìnema Trevi in Roma. Sa die de su 18 de freàrgiu l’ant dèdicada a Marisa Solinas, e est istada s’ocasione de unu resumu de prus de 50 annos de carriera artìstica.
Marisa Solinas nos at lassadu su 13 de freàrgiu deus 2019, cando li mancaiant pagos meses a lòmpere 80 annos.
Leave a comment