Sighint sas manifestatziones pro su deretu a sa salude in provìntzia de Nùgoro. Oe in Thiniscole, sede de unu distretu omònimu de s’Assl nugoresa cun àteros oto Comunes interessados (Garteddi, Irgoli, Lòcula, Lodè, Oniai, Orosei, Pasada e Torpé), unu corteu at animadu sas carreras prus mannas de sa bidda baroniesa. Sos presentes, cramados a s’apellu a pustis de sa manifestatzione pro su Santu Frantziscu, connoschent dae tempus sa situazione de su Poliambulatòriu e de su distretu: ispetzialistas semper in mancu; ginecologia tancada dae prus de un’annu; pneumologia dae duos; cardiologia cun unu cardiòlogu ebbia e cun prenotatziones pro su 2023; gasi etotu pro endocrinologia e reumatologia; urologia petzi pro sa diàlisi (pro sas bìsitas tocat a nche lòmpere a Nùgoro); peruna vìsita geriàtrica a domo; neurologia cun unu mèigu luego in mancu; oncologia tancada e mai torrada a abèrrere; mèigos de base non bastantes e unu pediatra ebbia a pustis de unu trasferimentu chi a su presente est lassende 950 pitzinnos sena dotore; serd serradu; tzentru de salude mentale in crisi; consultòriu privu de ginecòlogu. Sos manifestantes, lòmpidos a su poliambulatòriu thiniscolesu, pedint a sa polìtica una sanidade garantida a totu sa populatzione.
màuru piredda
Leave a comment