Mancari pagu tempus a como Salvini bidiat su rolu suo de ghia de sa Lega in arriscu, sa lòmpida de su Presidente americanu Trump a sa domo arba at solobradu sos perìgulos. Torrende a li dare una fortza chi pariat pèrdida dae cando Giorgia Meloni est sa Presidente de su Cussìgiu. Sos problemas chi aiat fiant mescamente cun su cantu de partidu prus ligadu a sos territòrios, s’ala vèneta mescamente non at in cunsideru mannu sa manera de comunicare malarrimada e s’olvidu de sa punna federalista. In prus, in custos annos, Salvini at bistu Fortza Itàlia, sena s’impèllida de Berlusconi, barighende su partidu suo. Cun onni eletzione chi at sutalineadu sa paga capatzidade de Salvini de agatare un’acordu patzìficu cun sos alleados.
In custu cungressu at proadu a fàghere bìdere a sos suos sa retza de cuntatos e s’istima internatzionale chi tenet. Est craru chi non semus faeddende de cantos de cultura o de figuras cun una sensibilidade umanitària, ma de Marine Le Pen (inoghe e inoghe sos artìculos nostros) e de Elon Musk: espressadas de sa dereta prus niedda chi b’at in su mundu. Sa prima at acraridu chi Salvini est un’amigu caru e chi sa batalla sua contra a sa sentèntzia chi la bogat dae sas eletziones, at a andare in dae in antis, ca — segundu issa — est petzi unu sèberu polìticu nàschidu dae sa timoria. Elon Musk at postu carchi duda a subra de sos dàtzios de Trump, però at fintzas cunfirmadu chi sa lìnea de su Presidente USA est cussa prus giusta.
Su sustènniu de custos e de àteros Salvini l’est impitende pro cumbìnchere a Meloni a lu fàghere intrare in su Ministèriu de s’Internu, pro proare a incungiare carchi votu in prus e pigare in sos sondàgios. Ma sa Presidente non nde cheret nemmancu s’intesa, ca non tenet fide peruna: Salvini s’est consumende in su Ministèriu de sos Trasportos, fatende bìdere cantu non renesset a fàghere e boghende iscusas pro cuare s’incapatzidade sua.
Gabriele Tanda
Leave a comment