Si nch’est acurtziende su 21 de freàrgiu, die internatzionale de sa limba materna. E in Sardigna l’ischimus chi in prus de su sardu, sa limba de minoria sa prus faeddada de s’istadu italianu, bi nd’at àteras bator. In S’Alighera, ue faeddant sa variante locale de sa limba catalana, Comune e Consulta tzìvica pro sas Polìticas linguìsticas si sunt indiritzados a sas iscolas pro chi a custa die si diat su valore dèghidu.
Su vitze sìndigu Francesco Marinaro, chi in sa Giunta Cacciotto tenet sa dèlega a sas Polìticas linguìsticas, at imbiadu una lìtera a sos dirigentes de sas iscolas tzitadinas pedende·lis de pònnere in parte sos alunnos issoro pro chi s’arresonet de sa llengua, de s’importu suo e de su veìculu culturale chi issa etotu rapresentat. «In ocasione de custa die – at iscritu – diat èssere cosa de giudu a prevìdere in sas classes unas cantas initziativas chi punnent a promòvere s’amparu de su catalanu de S’Alighera».
Su matessi invitu, movende però dae su traballu chi sunt faghende sos assòtzios impignados pro ispainare s’aligheresu, l’at fatu su presidente de sa Consulta tzìvica pro sas Polìticas linguìsticas Gavino Balata: «Semus sensìbiles a custa temàtica e amus su disìgiu de bos invitare a dedicare un’agigu de su tempus bostru pro chistionare, pro bos informare, pro espressare curiosidades, pro lèghere unu contu, una poesia, pro bìdere unu film in sa limba nostra: in pagas paràulas , diamus chèrrere a la faghereis bìvere in sas àulas bostras».
«Sa limba nostra – annanghet Balata –, mancari tutelada dae leges natzionales e regionales, in prus de sa Costitutzione, est bivende tempos de dificultade e non s’at a pòdere afortire e nemmancu diat pòdere àere unu benidore si colat s’ismèntigu in sas generatziones noas. Est de sa sotziedade e de sas famìlias sa responsabilidade de amparare custu iscusòrgiu».
mauro piredda
Leave a comment