– de Salvatore Serra –
Polìtica linguìstica cheret nàrrere finas a presentare in sardu òperas chi tèngiant un’alenu internatzionale. Ca sa limba nostra la cherimus protagonista in su mundu.
In s’ischeda de oe bos presento “S’Alfabetu de sos hobbit”, libru cuidadu dae Stefania & Ilaria Carta e publicadu in su 2021 dae Alfa Editrice. Sos disinnos e sa realizatzione gràficas sunt de sas autoras etotu.
Su libru si fundat subra de s’iscritura mesu artifitziale, basada in sos alfabetos rùnicos, imbentada dae J. R. R. Tolkien pro sas limbas costruidas chi issu at disinnadu e impitadu in sos traballos suos. In prus de èssere iscritu in sardu, b’est finas su currispondente in italianu.
Comente si leghet in s’istèrrida de sas autoras, “Su propòsitu de custu libreddu est ammustrare chi su sardu est una limba neo-latina che sas àteras de sa matessi famìlia. Una limba bona pro arresonare de calesisiat tema, dae su bassu diàriu a su prus artu literàriu, dae sas òperas de su sèculu XX, che sas òperas de Tolkien, a su tzìnema… S’Alfabetu de sos hobbit naschet pro acurtziare sos sardos e sos italianos a sa limba cun sos personàgios chi Tolkien at creadu, personàgios amados e connotos in totue. Su testu italianu a cara cheret inditare chi su sardu no est gasi difìtzile e si podet imparare che totus sas limbas. ”
Inoghe amus seberadu, a ghisa de mustra, sas definitziones de “siddadu” , de “turre”e de “re”
………………..
Meda sunt sos siddados de sa Terra Mesania. Sos prus mentovados sunt sos Aneddos de su Podere, s’oro de Thror furadu dae su dragu Smaug, in ue bi fiat s’Archepedra, s’oro malefadadu de su dragu Glaurung e sos tres Silmaril, causa de dolore pro Alvos meda
………………
Barad-dur est sa turre de Sauron. Issu l’at fraigada in sa Segunda Edade cun su podere de s’Unicu Aneddu e fiat sa fortilesa prus manna in sa Terra Mesania finas a sa de Tres Edade.
………………
S’Artu Re de Arnor e Gondor fiat su re de totus sos dùnedain. Su primu re cun custu tìtulu fiat Elendil, s’ùrtimu Elessar Telcontar chi aiat postu torra umpare sos regnos in sa de Bator Edade.
Leave a comment