A Marine Le Pen l’ant cundennada. Nd’at faeddadu Gianni Muroni in custas pàginas, finas iscriende unas cantas dudas. Una pertocat sa sentèntzia de apellu intro de s’istiu de su 2006. Marchemus·nos·la custa data ca est in antis de sas presidentziales. Duncas no est galu iscritu chi issa non b’at a pòdere a pigare parte. Ma comintzemus ipotizende una cundenna definitiva: de custa manera ant a crèschere sos votos pro su partidu suo chi giai teniat possibilidades mannas de vitòria pro sa conchista prus chi non disigiada de s’Eliseu. Duncas si no est issa at a èssere un’àteru esponente de su Rn. Sos milliones de eletores de custu partidu, bi siat o mancu issa, ant a lòmpere deretu a sa sìntesi chi ant chertu cundennare una persone inimiga de su sistema, mancari no lu siat sende chi est orgànica a su modellu. Finamentas ca Le Pen no est acusada de cussu tipu de corrutzione chi detèrminat un’arrichimentu personale, petzi de àere tratadu a praghere suo sos fundos de sos collaboradores in su parlamentu europeu. Pròpiu de cussa Europa chi issa e is eletores suos cuntestant. Diat pàrrere belle motivu de bàntidu. De onni manera no est una cundenna a fàghere bìnchere sos aversàrios: l’amus bidu cun Trump in Amèrica. A su presente, s’in casu currat Bardella in càmbiu de Le Pen, su Rn est a su 35-36% de sos cunsensos cunforma a sos ùrtimos sondàgios. Como imbetzes ipotizemus chi sa magistradura l’assolvat. Tando eja chi sa vitòria est garantida giai dae su primu turnu. S’inelegibilidade partziale sua s’at a mudare deretu in elegibilidade definitiva. Su momentu est delicadu e sa fortza de sa dereta estrema est a unu puntu chi cale si siat cosa contra a issa dae parte de su sistema (finas cun resones mannas pro intervènnere) pintas a issa comente alternativa, finamentas pro more de sa mancàntzia de un’alternativa chi l’iscontzet su giogu in s’allega pùblica.
mauro piredda
Leave a comment