Sa tumba de sos gigantes de Imbèrtighe

                                             de Salvatore Serra

Sa  tumba de sos gigantes de Imbèrtighe   est unu monumentu archeològicu chi s’agatat in su cumonale de Bòrore, a probe de sos apendìtzios de sa bidda. Su giassu s’agatat  in unu tretu mannu de sa Sardigna tzentrale,  sa campeda basàltica de Abbasanta, rica de testimonias  archeològicas, e est cunsideradu unu de sos  monumentos sepulcrales prus de importu de s‘Ìsula.

Imbènnidu in su “Voyage en Sardaigne” de su 1840  dae su militare cartògrafu Alberto Lamarmora, descritu e fotografadu a cumintzos de su 900  dae s’archeòlogu iscotzesu Duncan Mackenzie e definidu dae su paletnòlogu Giovani Pinza in su libru suo “Monumenti primitivi della Sardegna” (1901) comente «il prospetto del più bel sepolcro di giganti che si conosce in Sardegna», Imbèrtighe mantenet oe s’istele  imponente archeada e una parte de sas  alas de s’esedra. Non b’at abbarradu arrastu de su vanu funeràriu; belle gasi,  gràtzias a sa  documentatzione produida dae La Marmora e dae Mackenzie est possìbile a nche torrare a sa mannària de sa sepultura. Custa fiat formada dae unu corpus tumbale  de sa largària de  m 11,50, cun su vanu funeràriu longu noe  metros e ladu unu metru, e dae un’ esedra manna cun una fune de 10/11 metros e una fritza de 5,40 m..

S’esedra l’ant fata cun codinas iscuadradas de basaltu,  postas, comente no acuntesset a s’ispissu. in fileras regulares, a diferèntzia de sas àteras tumbas de sos gigantes (comente aiat oservadu finas La Marmora) in ue a su sòlitu est formada dae lastras de pedra istichidas in manera verticale in su terrinu. In mesu b’est s’esedra, cun un’artària de tres metros e 65, e si distacat s’istele, monolìtica, cun una forma belle ellìtica e traballada a fine; su prospetu, rugradu dae sa  fràngia orizontale tìpica chi lu dividit in duas partes, resurtat formadu dae sa base, lisa e prus ispissa, arta 88 tzentìmetros, dae s’ala mesana, a forma trapetzoidale e arta m 1,04, e dae sa lunita superiore, arta, in su tzentru, m 1,21. Su monolitu est sinnadu in s’oru dae una curnitza a relevu pranu chi s’arressat in bassu in ue b’at, in positzione tzentrale, su portellitu de intrada a su vanu funeràriu (m 0,49 x 0,58 x 0,48) cun sos contones  de subra meda arrotundados.

Su  sepulcru nche torrat a  su tempus de su Brunzu mèdiu.