S’11 de santugaine de su 1922, cun s’armistìtziu de Mudayna, finiat sa gherra greguturca. Su cunflitu fiat istadu unu de sos efetos de sos tratados de paghe de sa Prima Gherra Mundiale chi non fiant agradados a sos istados derrotados ma finas, pensemus a s’Itàlia, a sos binchidores.
Custa inchietesa diat giùghere, in pagos annos, a s’afirmatzione de su fascismu in Itàlia e de su nazismu in Germània.
Ambas duas partes si cheriant garantire su controllu de sa costa orientale turca, chi finas dae s’edade omèrica fiat populada dae gentes ellènicas.
Fiat un’atumbu duncas intre duos natzionalismos, a unu chirru su de sa Megali Idea grega, s’idea manna de torrare a bia sa mannesa de s’època bizantina, a s’àteru cuddu làicu de sos Giòvanos Turcos de Mustafà Kemal Pascià.
S’ùrtimu episòdiu de su cunflitu, su prus significativu, fiat istadu s’ocupatzione de Smirne.
Sas tropas gregas ddoe fiant lòmpidas in su beranu de su 1919. Su tzentru abitadu fiat populadu in majoria dae gregos ma finas dae armenos, cun una cumponente turca non tropu pitica.
Su 13 de cabudanni de su 1922 s’esèrtzitu turcu aiat postu fogu a sa tzitade pro nche catzare sa populatzione cristiana.
Sa motivatzione de su fatu fiat de caràtere ètnicu. Giai durante sa prima gherra mundiale sa Turchia, issara galu Imperu Otomanu, finas si in fase de licuidatzione, fiat istada teatru de su genotzìdiu armenu.
In sas dies de su fogu de Smirne sunt mortos unos trinta mìgia intre gregos e armenos. Su fatu faghet parte de su chi sos gregos ddi narant sa Catàstrofe de s’Àsia Minore.
Unu de sos puntos de sos tratados, su prus importantes ca at rapresentadu una novidade, fiat s’iscàmbiu de populatzione. Unos chimbighenta mìgia turcos aiant lassadu sas terras gregas e unu millione de gregos, imbetzes, aiat abbandonadu sas terras in ue biviant dae millènnios, incruida Costantinòpoli.
(gianni muroni)
Leave a comment