A pustis de dies de duda e de tratativas sa Regione, sa Comuna de Aristanis e sos asòtzios chi ammanìgiant sa Sartìglia ant agatadu un’acordu cun su Ministèriu e gasi su Componidori e totu sos cabadderis caratzados podent cùrrere. Su problema fiat nàschidu dae su Decreto Abodi chi in martzu de su 2025 aiat postu règulas istrintas pro sas manifestatziones a caddu a fora de sas istruturas isportivas (incarca inoghe pro bìdere un’àteru artìculu).
Pro sa lege noa sos chi essint a caddu in una carrera chi non siat un’ipòdromu depent pònnere unu caschitu e una tzancheta protetora. Su problema est cun manifestatziones chi giughent una traditzione manna de bestimenta e de usos chi nde faghet a mancu e chi non permitit de annànghere trastes de seguresa, che a sa Sartìglia.
Sa manera agatada pro barigare sos istorbos fraigados dae sa lege Abodi est istada cussa de pònnere in mesu s’Asi, Asòtzios isportivos e sotziales italianos. S’ente at pòdidu omologare sa carrera in cara de sa Catedrale de Aristanis e sa bia Mazzini comente percursos isportivos e tando at fatu intrare sa Sartìglia, de su totu, in un’àtera genia de règulas chi non tenent bisòngiu perunu nen de caschetos nen de àteras bestimentas.
Sa manifestatzione aristanesa est sarva e aberit un’àidu a sas àteras cursas a caddu de sa traditzione. Sa dimanda però est si cuss’àndala la podent impitare totu cantos. Sa Sartìglia si faghet in carreras largas e pro su prus in pianu, ma no est gasi, pro esempru, pro s’Àrdia o pro sa Carrela ‘e nanti. E fintzas s’omologatzione de como, no est una fiantza pro sos annos chi benint, ca finamentas cussas règulas podent cambiare.
Sa chistione paret tancada, ma abarrat aberta. Difatis, ite at a capitare si, a dolu mannu, sutzederet un’intzidente de cale si siat genia in una de custas “manifestatziones omologatas”? Nde semus seguros de a beru chi non serbit una lege regionale, o nessi un’acordu prus mannu e de sistema, chi pòngiat sas cursas a caddu de sa traditzione sarda in una iscera a banda? Sa polìtica sarda est capatze de lu fàghere? E dimanda fintzas prus manna: in su tempus benidore in Sardigna at a èssere prus forte sa cultura sarda o cussa animalista chi at iscritu su decretu Abodi?
Gabriele Tanda
Leave a comment