Le frazioni del Moro est unu romanzu fantasy, iscritu dae Gianluca Medas, atore e autore teatrale famadu.
Su tìtulu est unu riferimentu craru a s’emblema natzionale, sos bator moros, chi, una borta unidos in un’ùnica bandera, rapresentant s’unidade de totu sos sardos.
Su contu est de fantasia ma est finas una versione de s’istòria sarda contada cun paritzos riferimentos a sos fatos istòricos, in ue sos tempos giudicales torrant a bìvere in una trasfiguratzione mìtica, rapresentada dae una gherra contra a un’Inimigu disapiadadu e, paret, onnipotente.
A custa istòria si acàpiant elementos de sa mitologia sarda. Sos diferentes personàgios de sas paristòrias prus connotas intervenint in sa narratzione, a chie gherrende cun sos bonos e a chie cun sos malos. Sunt presentes janas, cogas, ammuntadores, erchitos, Maria Farranca e sa Musca Maghedda. Unu ruolu de importu est riservadu a sos caddos birdes, forsis sas figuras prus evocativas de sa demologia sarda.
In mesu de èsseres ammajados, de res e de dimònios, si movent, intre Casteddu e Tàtari, intre Orgòsolo e Santu Idu, Pedru e Antoneddu, duos pastoreddos, sos eroes pitzinnos de su contu.
A sa fine, in custa visione de s’istòria bida cun sas lentes de su mitu sas cosas andant in manera aizu diferente dae su chi est capitadu de a beru.
S’òpera de Medas est sa dimustratzione chi ddoe podet àere un’èpica sarda e unu fantasy sardu, originale, chi tenet comente elementos fundativos fatos e contos tìpicos de s’Ìsula, chi dant un’identidade definida a su contu, renessende a su matessi tempus a resurtare universale, bidu s’impreu de archètipos narrativos caraterìsticos de custa genia literària.
Le Frazioni del Moro, essidu in su 2010 pro Condaghes, est su primu romanzu de Medas.
Sas figuras, chi tenent s’istile gràficu de sos manga giaponesos, sunt de Stefania Costa.
(gianni muroni)
Leave a comment