Eris, in unu cunvegnu ammanigiadu dae sos betzos cussigeris regionales, est essida a campu sa timoria de polìticos meda chi forsis sa Sardigna non at a resèssere a ammanigiare su dinari de su PNRR. Pagu tempus, ma mescamente paga gente pro sighire progetos complicados.
A lu nàrrere a sa vitze ministra Alessandra Todde est istadu s’assessore de sos traballos pùblicos Aldo Salaris chi at pedidu unu pagu de tempus in prus. Semus faeddende non de carchi meses in prus ma de annos. Su PNRR però est unu pianu europeu chi òbligat a agabbare sos traballos in presse e ponende·los in atividade dae deretu. E chie sèberat no est s’Itàlia, ma s’Europa intrea.
Tando a su primu problema mannu si nd’annanghet un’àteru. Si sa Regione at a resèssere a fraigare istruturas sanitàrias o pro s’imparu, tenet sas fortzas pro las abèrrere a sa lestra? At gente chi bi traballet dae s’incràs? Connoschimus s’apretu de sa sanidade a die de oe e fintzas s’iscola no istat gosi bene. Andende a dae in antis sa Regione diat pòdere furriare unu muntone de fundos chi a sa Sardigna serbint meda de a beru, perdende un’ocasione manna chi no at a capitare torra luego.
(redatzione)
Leave a comment