Posca chi pro meses intreos sos nùmeros de su Covid in Sardigna fiant peorende, dae una cantas chidas ant incumintzadu a si arressare, pro more de custa mòvida s’ìsula a istesiadu s’arriscu de devènnere groga.
Sos livellos de ocupatzione de sos ispidales sunt semper artos, ma sos malàidos pro chentu mìgia abitantes dae duas chidas sunt belle chi ammesados. Su pro ite est bastante craru: meda de sos turistas sunt ghirados e cun gente meda de mancu su virus trafigat de mancu.
Su cambiamentu fiat de a beru serente, custa borta, ma Solinas at ammanigiadu sos repartos pro abbassare su livellu de ocupatzione, trasformende·los in letos disponìbiles pro s’apretu de s’epidemia. Su problema est chi, in custa manera, sas àteras patologias ant dèvidu isetare e galu como no ant prus unu logu in ue andare a si curare. Amus a bìdere in sas chidas imbeniente si s’andanta at a sighire gasi, isperende chi su pilisu de custos annos agabbet.
In su mentres su tzertificadu birde at a èssere obligatòriu in àteros logos: cale si siat persone chi intrat in sas iscolas e in sas universidades, fintzas sos babbos e sas mamas, lu depent tènnere; sa matessi cosa pro sos ospìtzios. Custas medidas s’annanghent a sas àteras chi intraiant in vigèntzia a s’inghitzu de cabudanni: tzertificadu birde pro intrare in sos tzilleris e in sas osteras, in sos museos, in sos cuntzertos, in sas palestras e in sas pischinas, in sos aèreos e in sos navios e fintzas in sos cuncursos.
Gabriele Tanda
Leave a comment