Pro cumprèndere sas dinàmicas econòmicas de s’Itàlia de oe est de importu a ischire comente funtzionaiat su sistema bancàriu de custu Rennu, e comente l’ant deistruturadu.
In custu arresonu depimus mòere dae s’atzione de su re Gioacchino Murat, chi aiat cambiadu meda a beru su sistema bancàriu meridionale fundende su “Banco delle Due Sicilie”, articuladu in duas brancas, sa “Cassa dei Privati” e la “Cassa di Corte”. In su 1844 est nàschida sa “Cassa di Corte” de Palermo e in su 1846 sa “Cassa di Corte” de Messina, chi in su giru de pagos annos las ant a pònnere in pare in su “Banco Regio dei Reali Domini al di là del Faro”. Ammentemus chi, pustis, in su 1858 est nàschida sa “Cassa di Corte” in Bari e in su 1860 la “Cassa di Corte” in Reggio Calabria e in Chieti. Fiat unu sistema bancàriu poderosu, a su puntu chi in su 1860 su “Banco delle Due Sicilie” podiat bantare una richesa de unos 440 milliones de liras in monedas de oro, cando chi sa richesa monetària de totu sos àteros Istados italianos postos in pare non nche lompiat a unu balore de 230 milliones de liras, e su prus fiant in cartamoneda.
A pustis de s’ “irrobatòriu garibaldinu”, cussu pagu chi abbarraiat de su “Banco Regio dei Reali Domini al di là del Faro” at truvadu in s’istitutu nou “Banco di Sicilia”, cando chi su “Banco delle Due Sicilie” l’ant cambiadu in “Banco di Napoli”, amministradu dae funtzionàrios piementosos. Su “Banco di Napoli” at a tènnere sa tarea, pro 65 annos, de emìtere moneda in su Rennu de Itàlia, finas a cando custa funtzione no l’at a leare, in su 1926, sa “Banca d’Italia”.
Duncas, giai cando est lòmpidu Garibaldi, su sistema bancàriu meridionale at cumintzadu a tènnere dannu mannu, pro èssere, pustis, isbiculitadu cun s’Unidade de Italia. No est de badas chi oe su “Banco di Sicilia” est de propiedade de “Unicredit”, una banca milanesa, e su “Banco di Napoli” de “Intesa-San Paolo” una banca torinesa.
In su 1861 at cumintzadu una mòida manna de capitales dae su meridione a su setentrione e su protzessu est istadu lestru meda e sena remèdiu, a su puntu chi, a pustis de pagas dècadas dae s’unificatzione, de cuddu mundu bancàriu ricu abbarraiat petzi s’arrastu.
