Pro sa Regione su servìtziu chi si òcupat de limba sarda, no intamen s’acorpamentu cun s’editoria, est de livellu e positzionamentu “bassu”. Lu narat sa Giunta Regionale in sa delìbera 18/17 de su 21 de abrile in ue s’esecutivu regionale at riorganizadu s’aministratzione e graduadu sa positzione de cumplessidade de totu sos ufìtzios regionales.
Su servìtziu ghiadu dae Maria Isabella Piga, chi at leadu sas cumpetèntzias de sa polìtica linguìstica, est istadu valutadu dae su guvernu regionale comente un’istrutura de pagu contu, cun pagu cumplessidade, pagu dinare e pagu importàntzia in s’organizatzione burocràtica. A segus de sa proposta de s’assessora Clàudia Firino, difatis, totu sa giunta est istada de acordu a li dare una classificatzione de livellu “3” chi est semper e cando su prus bassu. Ateros servìtzios comente cussu de s’Istrutzione o de s’Ispetàculu ant leadu in tames positzionamentu “1”, chi diat èssere su livellu prus artu.
Ite càmbiat in s’atividade de sos ufìtzios? Càmbiat chi no est bellu pro una Regione Autònoma chi at duas minorias linguìsticas reconotas dae s’istadu (sardu e catalanu) a declararae gasi in atos pùblicos chi sos ufìtzios chi si òcupant de custa matèria non sunt de primu livellu, ma de ùrtimu. Est comente a nàrrere chi s’argumentu de sa valorizatzione de sa limba sarda no est cussu in su cale s’Aministratzione ponet sas energias, sas cumpetèntzias e sas resursas mègius. Est comente a nàrrere chi, pro custa Giunta, sa limba sarda si balet nudda o belle nudda, unu servìtziu de su livellu prus bassu.
A segus de custa classificatzione b’at àere una riorganizatzione generale de totu sos assessorados, Sos dirigentes ant a dèpere torrare totus a espressare una manifestatzione de interessu pro su servìtziu chi cherent ocupare. Podet èssere duncas chi Maria Isabella Piga non la cunfirment prus. O podet èssere chi abbarret a discretzione de s’assessore. Su servìtziu como, dae su puntu de vista econòmicu, no est su prus remuneradu ca, a manera òvia, un’ufìtziu de livellu “2” o “1” at a tènnere un’indennidade prus arta pro su dirigente.
Custu declassamentu de s’istrutura chi diat dèpere traballare pro sa polìtica linguìstica (ma finas a como s’at bidu pagu o nudda) sighit a s’acorpamentu fatu cun sos setores editoria e informatzione. E duncas, chi a abarret o nono sa dotoressa Piga, s’autonomia de sa limba sarda non b’est prus , e tempus e energias e resursas ant a dèpere èssere impreadas in sas àteras cumpetèntzias.
Leave a comment