Sa Rebellia de Palabanda, su 30 de custu mese s'ammentu

-de Sarvadore Serra-

Sa rebellia de Palabanda, afogada in su sàmbene, est s’ùrtima chi at bidu sos sardos bortendeˑsi contra a sos Savojas; pustis est cumintzadu su tempus de sos intelletuales “assimilatzionistas”.

Ma, bidimus comente sunt andadas sas cosas.

In su 1812, in Casteddu e in totu sa Sardigna, b’at àpidu una sicanna chi at distruidu sas incùngias e at incausadu una carestia manna; in su matessi tempus b’at àpidu un’epidemia de pigota; in Casteddu galu s’ammentant de “su famini de s’annu doxi”. In sa capitale sarda bi fiat su re Vittorio Emanuele I cun sos fideles suos, ca su Piemonte l’aiant ocupadu sos frantzesos. Su resurtadu est chi fiant aumentadas sas tassas, ca sa corte cheriat campada. Su deficit de su bilàntziu fiat lòmpidu a sa tzifra esagerada de 3 milliones, belle a tres bias de su tantu de sas intradas ordinàrias. In s’ìnteri su re fiat aumentende sas richesas suas personales, leende pro sesi dinare pùblicu e investendeˑlu in sas bancas de Londra.

Su pòpulu, disisperadu, at detzisu de si bortare contra a su re: sos rebelles si sunt reunidos in unu cungiadu de propiedade de s’avocadu Sarvadore Cadeddu, segretàriu de s’Universidade, chi s’agataiat in Palabanda, in cussu tretu in ue como b’est s’ortu botànicu. S’idea fiat de nche dispatzare sos funtzionàrios e sos cortesanos chi fiant arruinende sa Sardigna.

In mesu de sos organizadores bi fiant fintzas sos fìgios de Cadeddu, Gaetanu e Luisi, sos avocados Frantziscu Garau e Antoni Massa, su preìderu Antoni Muroni, s’insinnante Giosepe Zedda, su peddàrgiu Remundu Sorgia, su maistru de pannu Giuanne Putzolu, su piscadore Innàssiu Fanni, su paneteri Giagu Floris. Sa die de s’insurretzione l’ant fissada pro su 30 de santugaine de su 1812: sos rebelles ant disinnadu de intrare in su bighinadu de sa Marina dae sa ghenna de Sant’Austinu (lassada aberta dae sos sordados de guàrdia chi fiant de acordu cun issos) e de lòmpere a su bighinadu de su Casteddu pro arrestare a Giagu Pes de Villamarina, cumandante militare de sa tzitade, e dispatzare sos cortesanos.

Ma sa noa de sa cospiratzione est lòmpida a s’avocadu de su fiscu Remundu Garau chi at informadu su re e su coronnellu Villamarina, su cale, pro parte sua, at avèrtidu sos militares chi fiant a sos òrdines suos. Su paneteri Giagu Floris est istadu unu de primos a renuntziare cando at intopadu una patùllia de piemontesos; gasi etotu ant fatu unos cantos amigos suos. A su maistru de pannu Giuanne Putzolu e a unos cantos cumpàngios suos, in s’ìnteri chi fiant inghiriende in sos gutureddos de Stampace, los at intertzetados su coronnellu Villamarina; Putzolu, comente s’est bidu pèrdidu, at puntadu una pistola a Villamarina, ma sos amigos suos no l’ant lassadu isparare.

Sa repressione est istada terrorosa. Custas sunt istadas sas cundennas:

– cundennados a s’impicu: Sarvadore Cadeddu, Remundu Sorgia, Giuanne Putzolu – cundennados a morte in contumàtzia Gaetanu Cadeddu, Giosepe Zedda, Frantziscu Garau, Innàssiu Fanni – cundennados a s’ergàstulu: Giuanne Cadeddu, Antoni Massa – cundennados a su remu a vida: Giagu Floris, Pascale Fanni – disterrados sos àteros.

Sos atos de su protzessu sunt iscumpartos belle deretu dae sos archìvios. In cussu tempus fiat essida sa boghe chi sos imputados, durante sos interrogatòrios, aerent fatu su nùmene de Istèvene Manca de Villahermosa, funtzionàriu artu de sa corte de Carlo Felice, comente capu segretu de sa rebellia. Ma forsis sa beridade no l’amus a ischire mai.

S’ùnica cosa segura est chi dae tando est cumintzada sa restauratzione.