Su primu de cabudanni de su 2017 Tuenti, sa retza sotziale ispagnola posta in andare in su 2006 e chi pro tempus meda est istada una prataforma de primore pro sos givaneddos, at serradu pro semper. Cun issa sunt isvanèssidas prus de 6.000 milliones de fotografias chi sos impitadores aiant remunidu in cue. Sa retza aiat abèrtidu e postu a disponimentu de sos usuàrios unu programma pro iscarrigare sos album, però b’at àpidu pessones medas chi, o pro ismèntigu, o pro trascuradesa, o ca non si nde fiant abbigiadas, ant pèrdidu cussas imàgines.
Chie si siat chi tèngiat pagu prus de una dècada de esperièntzia in internet at a pòdere contare de datos chi pariant eternos ma sunt isparèssidos in s’ètere de sa retza. Curreos eletrònicos isghelados cando unu no impitat prus unu servìtziu de email (mancari s’account abbarret abertu), messàgios e publicatziones in forum chi sessant de esìstere, blog eliminados cando serrat sa prataforma chi los istrangiaiat, fotografias chi si burrant cando s’ impresa imponet unu lìmite nou, faddinas in sas migratziones chi faghent a manera chi si perdant 50 milliones de cantzones.
S’ùrtimu esempru est MySpace, chi in su 2019 at annuntziadu chi “oops, carchi cosa est andada male ”e est istadu impossìbile a lograre cussas cantzones pèrdidas, chi sos impitadores las aiant assentadas in cue dae su 2009 a su 2015. Semper e cando, pagas dies a pustis s’organizatzione pro sa preservatzione de sa web “Internet Archive” at publicadu unu catàlogu cun belle 500.000 audios archiviados. Est a nàrrere, sos impitadores aiant pèrdidu su ligàmene e MySpace no aiat fatu còpias de seguresa, però medas datos fiant assentados in àteros sitos. In custu casu, un grupu acadèmicu aiat iscarrigadu pagos annos in antis totu cussa mùsica e nche l’aiat posta in “Internet Archive”. Però si chie at pèrdidu sas fotografias o sos curreos eletrònicos no ischit chi istant in àteros servidores o non tenet s’intrada, los at a cunsiderare isvanèssidos pro semper.
Su perìgulu, tando, est chi, a tardu o a chitzo, totu su chi b’est in internet si perdat. At a èssere a beru gasi? L’amus a bìdere.
