Cras est Pasca de Nadale fintzas in Ucraina. Ocannu difatis, pro sa prima bia, sa festa ruet su 25 de custu mese cando chi finas a s’annu coladu fiat marcada in su calendàriu su 7 ghennàrgiu, comente pro totu sos ortodossos. Una rivolutzione (de su restu fina sa de su 25 de santugaine, de rivoltzione, ruiat su 7 de santandria) cajonada dae s’invasione russa de s’ex repùblica soviètica. Su mese de trìulas de custu istiu, a belle un’annu e mesu dae su comintzu de sa chi pro Putin est una operatzione ispetziale, su presidente Zelensky aiat firmadu una lege – cun su favore de sa Crèsia ortodossa de Ucraina – pro mudare sa festividade natalìtzia ponende·nche·la in sa die festada dae sos catòlicos e dae sos protestantes. Ma s’invasione russa at atzelleradu ebbia unu protzessu chi non comintzat su 2022. De sa possibilidade de sighire su calendàriu gregorianu si nde faeddaiat dae meda. Su 2014, cun s’annessione de sa Crimea, b’at àpidu una partzimenta de sa Crèsia ortodossa ucraina dae su patriarcadu de Mosca. Su 2017 su governu de Kiev aiat disinnadu de cuntzèdere a sos residentes sa possibilidade de festare ambas duas sas datas (su 25 de nadale e su 7 de ghennàrgiu), cun protestas in Mosca. Como sa detzisione de seberare su 25 ebbia, fintzas comente elementu simbòlicu de una Ucraina otzidentale e europea semper prus a tesu dae Mosca. Agigu de istòria. Su calendàriu giulianu est unu calenàriu solare chi movet dae su tziclu de sas istajones elaboradu dae s’astrònomu grecu Sosigene de Alessandria e promulgadu dae Giùliu Tzesare su 46 in antis de Cristos. Lu cambieint su 1582 cun su gregorianu pro currègere sas fartas chi, in sos sèculos, nch’aiat istesiadu sa data de s’ecuinòtiziu beranile. In Rùssia abarreit su giulianu, finas a su 1918, cando s’istadu sovièticu nàschidu dae sa rivolutzione adoteit su gregorianu.
màuru piredda
Leave a comment