Sa neuropsichiatria infantile de s’AOU de Tàtarisi cunfirmat unu puntu de riferimentu pro sa cura de sa sclerosi mùltipla

Sa neuropsichiatria infantile de s’AOU de Tàtari, direta dae professor Stefano Sotgiu, dae un’annu prus o mancu est parte de sa retze regionale de sos tzentros abilitados a formulare sa diàgnosi e dare su pianu terapèuticu pro sa sclerosi mùltipla in edade pediàtrica.

S’unidade operativa si cunfirmat unu puntu de riferimentu pro sa cura de una patologia chi s’agatat meda in su cabu de susu de Sardigna, gasi comente ant dadu a ischire unos cantos istùdios de s’AOU publicados in rivistas mèdicas internatzionales de importu.

“Pro su prus si faeddat de 5-10 casos pro 100mìgia abitantes suta sos 18 annos. Cun sos istùdios nostros – sutalìneat su diretore Sotgiu – amus istimadu chi in su cabu de susu de Sardigna sunt meda de prus. Su primu istùdiu de su 2016, chi pertocat s’epidemiologia de sa sclerosi mùltipla pediàtrica in s’àrea de Tàtari e Terranoa, mustrat comente semus colados dae una prevalèntzia mèdia de sa maladia, registrada in su 2001, de 2,8 casos pro 100mìgia abitantes in edade pediatrica, a una de su 26,9 in su 2012. S’ùrtimu istùdiu de su 2021 dat a bìdere unu aumentu de sa frequèntzia de sclerosi mùltipla pediàtrica in su territòriu nostru fintzas a sos 35,6 casos pro 100mìgia abitantes in edade evolutiva de oe. In su nord Sardigna amus su tassu prus artu in su mundu de sclerosi mùltipla in edade pediàtrica – narat Sotgiu – sa sclerosi mùltipla est definida pediàtrica cando si manifestat in antis de sos 18 annos; e custu càpitat in belle su 5% de totu sos esòrdios de sa maladia”.