Sa necròpoli de Prunitu est unu giassu archeològicu chi s’agatat in su Barigadu, regione istòrica de sa Sardigna tzentrale, in unu tretu chi si narat Sorrana. Faghet parte amministrativamente de Sorradile, in provìntzia de Aristanis, e est a unu chilòmetru dae sa bidda.
Su cumplessu est formadu dae duos aglomerados a unos chentu metros s’unu dae s’àteru, e b’at in totu 27 domus de janas. A su prus de sos ipogeos si podet lòmpere cun fatzilidade, ma pro arribbare a àteros, sigomente los ant istuvados in sa pinna verticale de unu bancone de roca trachìtica cun s’intrada posta a bator metros dae terra, tocat a colare dae unu paris chi b’est in subra.
Belle totu sas tumbas sunt formadas dae ambientes chi comùnicant a pare e presentant un’isvilupu planimètricu pro su prus longitudinale, a bias interessados dae sa presèntzia de vanos laterales.
Dae su 1980 sa necròpoli l’est istudiende sa Suprintendèntzia archeològica de Casteddu e Aristanis.
Cronologicamente su cumplessu cheret collocadu in su tempus de sa Cultura de Otieri de su Neolìticu finale – Eneolìticu (3500-2900 a.C.) ma si pensat chi l’apant torradu a impitare in su tempus de sos bizantinos.
