Un’ascusòrgiu istuvadu in sa roca e inghiriadu dae unu padente fungiudu de èlighes: est sa necròpoli de “Istevene”, in su sartu de Mamujada, in ue b’at una de sas pagas domus de janas de su de Nùgoro frunidas cun disinnos simbòlicos. Sa necròpoli nche torrat a su Neolìticu finale o a su cumintzu de s’Eneolìticu (3200-2800 a.C.). Su cumplessu de tumbas ipogèicas si profilat in unu contraforte de montes, a duos chilòmetros e mesu dae sa bidda. Sas domus sunt ses e sunt istuvadas a nivellos diferentes in sa roca. Su mesu sunt monotzellulares e duas sunt gasi minores chi parent nitzos.
Pro intrare a sa prima tumba tocat a colare in unu “dromos” – est a nàrrere su passadissu chi benit a pustis de s’intrada – cun unu portellu in sa pinna de fundu, chi rugrende·lu si lompet a una prima càmera retangulare. Una segunda càmera est collegada a sa prima pro mèdiu de unu passàgiu in sa pinna de giosso. Sa segunda tumba tenet unu dromos curiosu a pranta triangulare, chi introduit a sa càmera printzipale, a forma ellìtica. Finas inoghe in s’ala de giosso s’aberit s’intrada pro una càmera segundària, chi pro parte sua conduit a un’ ambiente, su de tres, cuadrangulare. Sos elementos prus caraterìsticos de sa necròpoòi sunt in sa de tres tumbas: in s’anticàmera s’aberint duas intradas a duas càmeras chi comùnicant a pare; una, chi si bi podet lòmpere dae su portellu in sa pinna de fundu, est partzida in duos setores dae un’istradedda. In sas pinnas b’at arrastu de pintura ruja e in s’ala de dereta b’at intzisiones verticales, cando chi in sa pinna de intrada b’at una cupedda tunda; in fines, in su pamentu b’at fossigheddas, custas puru tundas. In sa colunna in mesu de sa càmera b’at una protome taurina isculpida in relevu.
