Su 24 de santandria de su 1826 naschiat in Firenze Carlo Lorenzini. Giornalista e iscritore, at bogadu fama in totu su mundu cun Le avventure di Pinocchio. Storia di un burattino, impreende su pseudònimu de Collodi, dae sa bidda nadia de sa mama.
Sas peleas de Pinochio fiant essidas pro sa prima borta cun su tìtulu La storia di un burattino, a puntadas, in Il Giornale per i bambini, dae su 1881 a su 1883.
In su matessi annu fiat essidu su libru. Lorenzini fiat collaboradore de sa libreria e domo editora Piatti, in sa capitale toscana. In prus at traballadu comente tradutore e at collaboradu a diferentes rivistas, che a Il Lampione e L’Arte e La Scaramuccia, chi si ocupaiat de teatru, in ue Collodi est istadu protagonista comente commediògrafu.
S’atividade de giornalista dd’at giùghidu a iscrìere in La Nazione e La gazzetta del Popolo.
De ideales republicanos, in su 1848 aiat gherradu in sa batàllia de Montanara, in sa Prima Gherra de Indipendèntzia. Est mortu in Firenze in su 1890.
(redatzione)
Leave a comment