Su 12 de santugaine de su 2022 in sa presone de Màssama est mortu un’òmine de 42 annos, Stefano Dal Corso. Sa presone e sa procura de Aristanis aiant tancadu su casu comente suitzìdiu, ma a bellu a bellu sa famìllia de su mortu at incumintzadu a pònnere dimandas a sas autoridades. Dal Corso, difatis, depiat essire dae presone a pustis de pagos mese e non b’aiat resone peruna de si ochire. Sighende sa veridade, sos Dal Corso ant pedidu pro sete bortas de pòdere fàghere s’autopsia a su corpus de Stefano, ma sa procura at semper denegadu. Sas dudas ant dadu coràgiu a unu testimone a essire a campu e a faeddare cun sos abocados e cun sa famìllia.
A cabudanni de ocannu sas iscumbatas si sunt torra abertas, ma sunt andende a lenu. Sa testimonia at contadu de una vindita contra a su presoneri a pustis chi, intradu in s’infermeria, aiat iscobertu duas bàrdia cartzeràrias coddende. Sos agentes pro lu fàghere istare a sa muda, l’ant mazadu gasi a forte chi lis ant segadu s’ossu de su trugu cun unu fuste. Su testimòniu at naradu fintzas chi at unu vìdeu e sos bestires prenos de sàmbene de su presoneri, ca sas bàrdias, pro cobèrrere su chi ant fatu, l’ant tramudadu.
A pustis de un’annu s’onorèvole Roberto Giachetti at preguntadu a su Ministru de sa Giustìtzia de acrarire s’accontèssida. Nordio dae s’ala sua at amparadu sas fortzas de politzia e at decraradu chi non b’at duda a subra de su chi est capitadu. Su sindacadu de sa politzia penitentziaria de sa Sardigna como est pedende de àere prus defensa contra a sas acusas de sa famìllia Dal Corso, pro amparare su nùmere suo.
Non s’ischit galu nudda de siguru, tando, e s’iscumbat tenet s’ispera de ispricare comente e pro ite est mortu Dal Corso. S’atentu de s’imprenta però benit a pustis de una filera de casos giuditziàrios simigiantes e chi ant pesadu prus de unu suddidu. In prus b’at sa morte de Cucchi, e fintzas su vìdeu de sas violèntzias intro de sa presone de Santa Maria Capua Vetere. Totu cantas noas chi ponent in pensamentu pro sas cunditziones de sos càrtzeres in Itàlia.
Gabriele Tanda
Leave a comment