Est mortu Umberto Bossi, su fundadore de sa Lega Nord, su partidu prus betzu chi b’est in su Parlamentu italianu e chi est istadu pro tempus maicantu s’alleadu prus forte de Berlusconi. Bossi est lòmpidu a sa polìtica chi giughiat giai 38 annos, acurtziende·si a sos autonomistas de sa Badde de Aosta, imparados sos cuntzetos prus importantes, at fundadu sa Lega Lombarda. Semus faeddende de sos annos Otanta e pro more de una manera malarrimada de faeddare, in unu momentu in ue galu sa polìtica si faghiat cun sa limba in sos guantes, est crèschidu in presse in su nùmeru de sos votos de chie s’intendiat traidu dae s’Istadu italianu. Sos annos Noranta, però, sunt istados sos de su poderiu beru: Tangentòpoli chi at solobradu su sistema de sos partidos betzos e, mescamente, s’alleàntzia cun Berlusconi, chi l’at batidu in pagu tempus a èssere unu de sos parlamentares prus de importu. Un’època chi como est a tesu meda.
Unu partidu, sa Lega de Bossi, chi aiat comente punna prus manna s’autonomia de sas regiones de su nord de s’Itàlia e fintzas, nessi a s’incumintzu, s’indipendèntzia de sa Padània. Su senatur, chi fiat su paranùmene suo, at naradu male de s’Itàlia e at atacadu sas istitutziones e sos sìmbulos suos, at espressadu su ratzismu contra a sos meridionales, chi fiat cuadu intro de sos ànimos de sa gente de su nord, e at fatu cumprèndere a persones diferentes chi s’Itàlia fiat prus partzida de cantu non cheriant atrogare sos italianos etotu. Nàschidu fortza pro bortulare su sistema betzu de poderiu, nd’est divènnidu unu de sos prus cunservativos, mescamente a pustis de su 2004 cando l’at corfadu un’ictus e sa ghia, a bellu a bellu, l’at leada Matteu Salvini.
Unu personàgiu, Bossi, chi at neghes fungudas pro su chi pertocat su peoru de s’ambiente polìticu, ca at iscapadu s’òdiu peus chi fiat galu imbertu intro de sas cussèntzias; ma chi dae un’àtera banda, si cherimus chircare carchi cosa de bonu, at ingendradu curiosidade in sa manera prus mala, a subra de su cuntzetu chi sos pòpulos podent seberare a suta de chie istare e cun cales règulas.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment