S’8 e su 9 de làmpadas s’at a votare pro sos bator referendum pro su traballu e unu pro sos tempos de sa tzitadinàntzia a sos immigrados. A dolu mannu ischimus chi custa genia de votu, non semper at batidu resurtos in sos sèberos polìticos: sos de s’abba e àteros sunt abarrados un’inditu e pagu de prus, ma est beru chi como podent sinnare una voluntade de sa populatzione de pedire prus deretos pro sos traballadores e andare contra a sa filada leada dae su guvernu Meloni chi sighit a tènnere sos istipèndios bàscios pro favorèssere sas aziendas e sos imprendidores.
Chie b’at a balangiare si si lompet a su quorum est s’opositzione intrea, chi custa borta est resessida a abarrare aunida. Partito Democratico, Movimento 5 stelle e Alleanza Verdi Sinistra sunt proende a solovrare su mudìmine chi su guvernu at proadu a fàghere falare a subra de sa votatzione. Difatis, su tempus dedicadu a informare sos eletores in sa TV pùblica, e in sos àteros mèdia chi sunt cuntrollados dae su guvernu, est pagu meda e in medas no ischint galu chi su segundu fine de chida de làmpadas si depet andare a sas urnas. S’opositzione, dae s’ala sua, podet giùghere una bìnchida mancari non si lòmpat a su quorum, si sa gente chi at a andare a votare siat prus arta de sos chi ant votadu sa dereta a sas ùrtimas polìticas.
Pro custa resone fintzas sas decraradas chi sunt essidas a campu dae sos polìticos de dereta punnant a minimare sa partetzipatzione. Meloni e La Russa, pro esempru, fintzas si non ant naradu a craru de no andare a votare, ant atrogadu chi est mègius chi sos cuesitos non colant e chi una manera fàtzile est pròpiu cussa de si astènnere.
Ponende a banda sas chistiones de sos partidos italianos, su 8 e su 9 de làmpadas si podet votare dae sas 7 a sas 23 de domìniga e dae sas 7 a sas 15 de lunis e sas chistiones sunt:
1. A subra de sos litzentziamentos illegitimos, chi cun su Jobs Act sunt possìbiles e sos meres non sunt obrigados a si torrare a leare su traballadore catzadu. Nos preguntant si semus de acordu a torrare a si pòdere litzentziare sos traballadores petzi “per giusta causa”.
2. Chie benit litzentziadu sena giustificatzione peruna dae un’azienda minore, como podet pedire un’indennidade de màssime ses meses. Nos preguntant si cherimus ismanniare custu perìodu de indennidade a bisu de unu giùighe de su traballu.
3. Sos cuntratos a tempus detereminadu como si podent fàghere a sighidura, a s’imbesse nos pedint de pònnere sa resone ufitziale pro ite non si leat unu traballadore in manera definitiva.
4. Sos traballos bìnchidos in garas de apaltu, a s’ispissu benint passados a àteras aziendas sub-apaltadoras. Sa responsabilidade, como, est de s’impresa minore, e sa manna, chi at leadu su dinari de s’Istadu, non nde tenet. Nos pedint si semus de acordu a illarghiare sa responsabilidade fintzas a s’impresa titulare de s’apaltu.
5. Custa est s’ùnica dimanda a fora de su traballu. Nos pedint si semus de acordu a menguare de su mesu sos tempos pro leare sa tzitadinantzia italiana: dae 10 a 5 annos.
Gabriele Tanda
Leave a comment