de Salvatore Serra
Podimus nàrrere chi semus connoschende una revolutzione digitale linguìstica: cun Android 15 su sardu intrat in manera ufitziale in s’assòtziu de sas limbas chi si podent cunfigurare in sos dispositivos. Pro more de custa versione de su sistema operativu sos impitadores podent impostare una gerarchia de limbas preferidas. Si un’aplicatzione est traduida in sardu, at a mòere in manera automàtica in cussa limba.
Sa protzedura est fàtzile: bastat a incarcare Impostatziones > Sistema > Limbas > Limbas de su sistema e totu sas aplicatziones cumpatìbiles s’ant a adatare in manera automàtica.
Est dae meda chi b’at programmàrios bortados in sardu – su navigadore Firefox est un’esempru, gràtzias a su traballu de Sardware – ma finas a como non totu sas aplicatziones permitiant de seberare sa limba in manera manuale. Cun Android 15, in tames, finas aplicatziones che a OsmAnd, F-Droid e AuroraStore ant a èssere disponìbiles in sardu sena bisòngiu de àteras cunfiguratziones.
Su caminu, però, est longu: custa novidade at a fàghere su sardu prus atzessìbile in su mundu tecnològicu, ma b’at galu meda de fàghere. Sos de Sardware narant chi s’interfaghe de Android no est galu traduida, e pro como su sistema operativu non cunsentit de modificare in manera direta sas ischedas de sistema. Su fatu istat chi a bortare Android no est cosa de nudda: bi cherent mìgias, forsis milliones de paràulas, e su protzessu dipendet dae Google. Pro custu bi cheret s’agiudu de totus: tradutores, gràficos, amministradores de mèdia sotziales, programmadores.
Leave a comment