Finas ocannu su TERMCAT, Tzentru de terminologia catalana, at leadu parte in s’initziativa de presentare a sos istudentes de sos istitutos de Mollet sas mègius resursas pro bogare a campu tèrmines noos in catalanu.
Cun s’interessamentu de s’Ospidale de Mollet, chi at postu a disponimentu s’auditòrium suo, de s’Amministratzione comunale de Mollet e de su Servìtziu de Catalanu de Mollet (Tzentru de Normalizatzione Linguìstica de su Vallès Oriental – Cunsòrtziu pro sa Normalizatzione Linguìstica), su progetu s’est cuncretadu in bator sessiones de presentada de su TERMCAT indiritzadas a sos istudentes de s’ùrtimu cursu de sa segundària e de s’iscola superiore de sos istitutos de Mollet.
Sos professores ant retzidu, in antis de sas arresonadas, unas cantas propostas de atividades relatzionadas cun sa creatzione terminològica, inclùdidu unu cuncursu de ideas in ue sos alunnos depiant bogare a campu unu tèrmine nou in catalanu, aplichende sos critèrios chi ant bidu in classe, presentende·lu in manera creativa cun bisuras, pòdcasts, vìdeos, animatziones e totu gasi. In sas arresonadas sunt istadas cummentadas sas creatziones de sos alunnos e sunt istadas premiadas sas chi sunt resurtadas prus cunformes a sos critèrios chi a su sòlitu si sighint in contu de terminologia.
