Sa Giunta regionale puru at detzisu sa data de sas eletziones: su 12 de làmpadas. Ant a essere 8 sos miliones de italianos chi ant a andare a botare. In programma sas eletziones amministrativas e sos 5 referendum supra sa giustìtzia.
In Sardigna sos comunes interessados sunt 65: duos cun prus de 15mìgia abitantes ue, in casu chi in su primu turnu non s’arribet a su 50% prus 1 de sos votos, s’at a andare a su ballotàgiu su 26 de làmpadas. Semus faeddende de Aristanis, ùnicu cabu-de-logu de provìntzia a botare, e Ceraxus.
A livellu territoriale, sa provìntzia cun prus comunes chi botant, 19, est pròpiu sa de Aristanis; sighit sa de Tàtari cun 16; su Sud Sardigna cun 14; Nùgoro e Ogiastra cun 13 e sa Tzitade metropolitana de Casteddu cun 3.
Unu apuntamentu importante a livellu natzionale pessende a sas eletziones polìticas de su 2023, ma peri pro sas dimandas referendàrias chi pertocant sa giustìtzia, chi diant pòdere àere cunsighèntzias mannas pro sa polìtica natzionale. In Sardigna sas regionales ant a èssere in su 2024, ma sa situatzione polìtica est in mudamentu, cun sa verìfica in su centrudestra e sas cuntierras fitianas intre sos alleados de sa coalitzione chi apògiat sa giunta de su presidente Solinas. Ma non mancant sos dolores de matza in su centrusinistra puru, chi sunt s’ispigru de su chi est capitende a livellu natzionale.
Mariantonietta Piga