“In contu de festa natzionale de sos Sardos, sa Giunta Regionale no est faghende nudda. Su Presidente Ganau cùnvochet su Cussìgiu Regionale su 28 de abrile pro tzelebrare Sa Die de Sardigna”. Est s’apellu de su Coordinamentu pro su Sardu Ufitziale a sa pessone prus de importu de s’assemblea regionale, pro agatare unu remèdiu a s’impasse chi s’est creada.
Su Coordinamentu est faghende connòschere a totus s’acuntèssida curiosa de una norma de sa lege finantziària de ocannu chi at postu 200 mìgia èuros pro sas tzelebratziones chi ammentant sa dispedida de sos piemontesos in su 1794, ma chi pustis est iscumparta dae s’allegadu tècnicu de su bilàntziu.
“Ant faeddadu de unu discùidu tècnicu – narat su CSU – ma calicunu at pessadu a unu boicotàgiu polìticu de sa Die pro more de su caràtere natzionalitàriu suo. Semper e cando, a 22 dies dae s’eventu, sa Giunta Regionale no at deliberadu e no at craridu su mistèriu de sos fundos iscumpartos, e como non bi sunt sos tempos tècnicos pro cumpletare su caminu protzedurale normale chi sas Giuntas Soru e Cappellacci ant semper asseguradu”.
Su CSU narat chi est in pessamentu ca est timende a nche bogare sa festa, e, in manera provocatòria, pedit a a Ganau de assegurare sas tzelebratziones cun una cunvocatzione solenne de su Cussìgiu, superende su mudìmene curiosu de s’esecutivu chi est faghende tìmere sas peus cosas. In sos meses colados su Coordinamentu, un’assòtziu chi bi tenet meda a sa polìtica linguìstica e a sos temas identitàrios, aiat giai pesadu una cuntierra cun sa Giunta ca sa Die non resurtaiat finantziada in sa proposta de bilàntziu imbiada a su Cussìgiu. In àula, cando b’at àpidu sa discussione, un’emendamentu aiat postu a disponimentu su dinare chi bi cheriat. Pustis nos ant torradu a pònnere in anneu, ca sa Giunta, a pagu dies dae sa data istòrica, at ammissu chi non tenet sa disponibilidade finantztària in sos capìtulos de Sa Die e no at galu deliberadu.
“A non tzelebrare a livellu istitutzionale sa die natzionale de su Pòpulu Sardu diat èssere grave a beru – narat su CSU – e diat mustrare sa contrariedade de s’esecutivu regionale a sos temas de s’autodeterminatzione e de s’identidade linguìstica. Ganau e su Cussìgiu bi pòngiant manu”.
Lunis , 6 de abrile de su 2015
Su Coordinamentu pro su Sardu Ufitziale
Leave a comment