Custas dies coladas su Parlamentu de Catalugna at votadu su primu atu de”disconnessione” (comente l’ant mutida) dae s’Ispagna. Sa motzione est colada cun prus de deghe votos. Contras totu sas opositziones e fintzas Podemos. Como si isetat sa reatzione de su guvernu de Madrid. Luiseddu Caria at traduidu sas normas aprovadas dae su Parlamentu de Bartzellona e nos at autorizadu a las publicare inoghe. Lu ringratziamus meda pro custu servìtziu fatu a nois e a sa comunidade sarda.
Sa declaratzione votada dae su parlamentu catalanu:
«Su Parlamentu de Catalogna:
I. Leat atu chi su mandadu democràticu otènnidu in sas eletziones passadas de su 27 de cabudanne de su 2015 est fundadu subra de una majoria de sègios de sas fortzas parlamentares chi ant s’obietivu chi sa Catalogna diventet un’istadu indipendente, e cun una majoria soberanista manna, siat a livellu de votos chi a livellu de sègios, chi punnat a abèrrere unu protzessu costituente e non subordinadu.
II. Declarat in manera solenne su cumentzu de su protzessu de creatzione de s’istadu catalanu indipendente in forma de repùblica.
III. Proclamat s’inghitzu de unu protzessu costituente tzitadinu, partetzipativu, abertu , integradore e ativu chi potzat preparare sas fundamentas de sa costitutzione catalana benidora.
IV. Bolet impressire a su guvernu catalanu imbeniente pro chi leet sos provedimentos netzessàrios pro fàghere èssere efetivas custas declaratziones.
V. Cunsiderat chi siat dèghidu a cumentzare intro de su tèrmine màssimu de trinta dies s’elaboratzione de sas leges de su protzessu costituente, de seguresa sotziale e de sa finàntzia pùblica.
VI. Comente depositàriu de sa soberania e espressione de su podere costituente, torrat a afirmare chi custu parlamentu e su protzessu de disconnessione democràtica no ant a èssere sutumissos a sas detzisiones de sas istitutziones de s’Istadu ispagnolu, e in particulare de su Tribunale Costitutzionale, cunsiderende custu ùrtimu chene legitimidade e cumpetèntzia dae a pustis de sa sentèntzia de su mese de làmpadas de su 2010 a pitzus de s’Istatutu de Autonomia de Catalogna, aprovadu dae su votu de su pòpulu in unu referendum, intre sas àteras [sentèntzias].
VII. At a adotare sas mesuras netzessàrias pro abèrrere custu protzessu de disconnessione democràtica, populare, lestra e patzìfica, dae s’Istadu ispagnolu in manera chi permitat s’apoderamentu de sos tzitadinos a totu is livellos e pro more de una partecipatzione aberta, ativa e integradora.
VIII. Cumandat a su guvernu catalanu de cumprire isceti cussas normas e cumandos emanados dae custa càmera, legìtima e democràtica, pro amparare sos deretos democràticos chi diant a pòdere èssere istrobbados dae sas detzisiones de sas istitutziones de s’Istadu ispagnolu.
IX. Declarat sa boluntade de cumentzare is negotziados pro fàghere èssere efetivu su mandadu democràticu de pesare un’istadu indipendente in forma de Repùblica e, aici matessi, lu dat a ischire a s’Istadu ispagnolu, a s’Unione Europea e de sa comunidade inernatzionale intrea.»