Oe un’àtera derrota a s’ùrtimu de s’iscuadra de basket de Tàtari ponet in pidinu sos tifosos. Sa Dìnamo, difatis, est penùrtima in sa classìfica cun tres partidas de giogare ebbia ma contra a de iscuadras in chima, chi sunt gioghende pro s’iscudetu e pro una positzione mègius in sos playoff. Su peus est chi maicantos disafios deretos cun sas àteras chi sunt batalliende pro sa sarvesa sa Dìnamo los at pèrdidos e como non balet tènnere sos matessi puntos: depet barigare sas àteras iscuadras de una bìnchida in prus e mancat su tempus.
Sa crisi tenet un’istòria longa in custa istajone chi naschet dae s’esòneru de s’allenadore Bulleri a pustis de chimbe pèrdidas. Fìamus galu in santandria, ma s’andanta pariat mala giai dae cuddu tempus. Veljko Mrsic est su chi at leadu sa ghia de s’iscuadra, ma sos resurtos sunt istados a lampalughe. Su setore chi no at dadu sa calidade chi sa sotziedade s’isetaiat est istadu cussu de sos italianos: cun nùmenes cun paga esperièntzia in sa sèrie prus de importu. Su problema est essidu a campu mescamente in sos minùtiles finales, cando sa conca faghet de prus e bisòngiat de domare sa timoria.
Un’àteru momentu de crisi, chi sa sotziedade no at ischidu sòrvere a sa manera mègius est istadu cando Beliauskas at àpidu problemas a sa cossa e Fobbs a su tèndine de su pee. In logu de custos giogadores est istadu leadu Jacob Pullen chi fiat bravu e cun una carriera longa, ma chi non nd’aiant prus pro una chistione de edade e de gana, tantu chi in freàrgiu sa Dìnamo at segadu su cuntratu cun isse.
Un’àteru repartu chi est andadu male de a beru est istada sa defensa: cun una cantidade de puntos sufridos chi at influentzadu s’agabbu de sas partidas. Una chistione chi beniat dae una manera de giogare chi non poniat aficu a su grupu, ma a su sìngulu ebbia.
S’ispera de sos tifosos in sos meràculos non s’istudat, ma s’annu est andadu male de a beru e sa retrotzessione paret prus a curtzu, a pustis de 16 annos intreos de Lega A.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment