Sa Dìnamo est atata?

Sa Dìnamo est atata?

S’iscuadra de basket de Tàtari est fadighende, e non dae como. S’annu coladu, comente s’istajone 2017/2018, est abarrada in sa positzione de deghe, e a fora de sa Copa Itàlia e de sos playoff pro s’iscudetu, ma sena totu sos impinnos de s’annu a dae in antis de sa pandemia. Ocannu, est sighende a no èssere gasi lùghida, cun resurtos bonos e malos, ma semper in una positzione bassa de sa Lega A.

Custu mese l’ant bogada a fora dae sa FIBA Europe Cup e at pèrdidu cun Scafati e cun s’Olìmpia Milanu in campionadu. A s’ispissu sas partidas lis sunt fuidas pro pagos puntos, unu canisteddu o pagu de prus. Sos biancos-biaitos in sos match ammustrant de fartare de ammanìgiu e echilìbriu.

S’istajone s’est aberta cun sa Dìnamo allenada dae Nenad Markovic, chi pediat meda a unu grupu chi non podiat bajulare de a beru sas lìneas suas, e isse pagaiat sa paga esperièntzia in Itàlia. Su 16 de bennàrgiu ant esoneradu a su serbu e in logu suo ant mutidu a Massimo Bulleri, chi at unu passadu comente giogadore e comente allenadore in sa Lega italiana e chi at dadu unu disinnu prus craru.

Una rosa pensada cun pagu tinu custa de ocannu: leende Fobbs, una bàrdia pagu prus bona de sa de s’annu coladu, paghende·la meda; ma ismentighende·si de comporare unu tzentru chi però no est lòmpidu mai, ca Thomas, comporadu pro tancare su chimbe, no tenet cussu rolu, ma su de ala manna. Un’iscuadra unu pagu torta, ma de mancu a cunfrontu de s’annu coladu.

E tando como abarrat una lista de faddinas: sa Dìnamo aiat promissu de suprire a sas Final Eight, sa Copa Itàlia, e no b’est achipida; est fora dae sas garas europeas, fintzas si sa sotziedade aiat decraradu chi si podiat andare a dae in antis; como fintzas sos playoff iscudetos parent a tesu cun ses puntos chi parent un’istorbu tropu mannu.

Sa Dìnamo paret chi apat mudadu sas punnas suas. Si a dae in antis su disìgiu suo fiat de lòmpere nessi a sos playoff, como sas ghias de sa sotziedade ammustrant de èssere atatas cun un’impèllida lèbia a s’iscuadra pro conchistare resurtos de importu.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *