de Anzelu Canu 
Sa delibera pro Lsc de sa comuna de Cabuderra in fines est ufitziale.
In custas dies de polèmicas in tundu a sa norma de impreare pro su sardu, crompet dae su cabu de giosso – chi calicunu narat siat s’ala discuntenta de sa Sardigna – unu sinnale forte in favore de una norma contras a un’idea de partzidura in duas cambas de sa limba sarda. Unu sinnale craru duncas chi fintzas in sos giassos de Casteddu, cando s’informatzione in pitzu a una norma iscrita bi lompet a manera curreta, b’at comunas chi sunt in favore de una norma sola, rapresentativa de totu sos dialetos e chi si lassat a in segus sos perìgulos e sos istentèrios anneosos de campanilismos e localismos sena cabu nen coa. Un’avisu fintzas a sa polìtica regionale, de essiret dae sas paules de sas timorias e de sas dudas pro sighiret sos caminos lìmpios e sena malesa giai traessados in custos ùrtimos deghe annos.
Mèritu mannu de custa faina est de Christian Ruiu, chi dae annos meda est impinnadu in sa batalla pro su reconnoschimentu de su sardu che a limba ufitziale. E pro bi cròmpere depimus èssere totu pìnnigos, comente at iscritu carchi die a como in su profilu suo de Facebook: “Semus binchidores, tottus unidos, campidanesos e logudoresos pro s’unidade linguistica e culturale de sa Sardigna intrega ”
Fiamus istados sos primos a dare una nova in anteprima e como b’est s’ufitzialidade. Su 30 de làmpadas de su 2014 su Cussìgiu Comunale de Cabuderra at aprovadu sa delìbera n. 40 –delìbera cc Cabuderra 7 de trìulas-cun un’òrdine de traballos pro sa die n. 6 –o.d.g. L.S.C.-(invertidu cun su 7) promòvidu dae Ruiu Christian e firmadu dae sos cussigeris Demuru Efisio, Magi Francesco, Cabiddu Giuseppe, Baire Maria Lucia (ex assessora regionale a sa Cultura), Dessì Giuseppe, Littarru Gianfranco e Frau Luigi.
S’importu de custa delìbera si cumprendet giai in s’ogetu: O.D.G.: TUTELA DELLA LINGUA SARDA NELL’AMMINISTRAZIONE PUBBLICA, NELLA SCUOLA E NELLA SOCIETA’- RICONOSCIMENTO DELLE NORME GRAMMATICALI E FONETICHE DELLA REGIONE AUTONOMA DELLA SARDEGNA PER L’UNIONE DEL CAMPIDANESE E DEL LOGUDURESE- INVERSIONE O.D.G.
De degheoto cussigeris chi bi fiant, in 12 ant votadu in favore e in 6 non ant votadu.
Su cussìgiu de Cabuderra, a pustis chi su 20 de làmpadas de su 2013 aiat adotadu “Is Arrègulas”, at duncas torradu a deliberare de limba sarda, e custa borta belle che a curregire sa delìbera de un’annu a como, ca sutalìniat chi cada comuna at sa libertade de impitare sa variedade locale, ma a su matessi tempus chi sa punna depet èssere a cròmpere a UNA limba iscrita subralocale chi diat unione a sos dialetos sardos e non pòngiat làcanas, inùtiles e dannàrgias. Sa LSC, si leghet in sa delìbera, est duncas su mèdiu iscritu “tra le parlate più comuni e diffuse e aperta ad alcune integrazioni volte a valorizzare la distintività del sardo e ad assicurare un carattere di sovramunicipalità e la semplicità del codice linguistico”.
Una norma iscrita comuna chi serbit duncas a garantire una “più efficace presenza ufficiale nei media, nell’amministrazione, nella scuola”, chi caminat serente a sos limbàgios locales sena los apeigare, antzis dende.lis sa manu pro los pesare prus a in artu, cun unu livellu de amparu e de promotzione meda prus forte ca est reconnòschidu dae sas leges (mescamente sa 26/97).
Cun sa delìbera n. 40, sa Comuna de Cabuderra, duncas, reconnoschet a sa polìtica linguìstica de sa Regione – de sos annos colados ebbia?- su grandu mèritu de un’atzione polìtica chi sighit sas trassas de àteras limbas minoritàrias europeas (ladinu, friulanu, romàntziu, bascu e catalanu).
Como isetamus sas rispostas e sas fainas de sa Giunta e de s’assessora Firino.
Leave a comment