Dae una chida su Cunsìgiu de sos Ministros at impugnadu sa lege regionale chi inditaiat sas àreas idòneas in ue fraigare sos impiantos fotovoltàicos e eòlicos. Su 31 de bennàrgiu sa Presidente Todde at atopadu su Ministru de s’Ambiente Pichetto Fratin in Roma, pro faeddare de prus de una chistione.
Dae cussu chi narat sa Regione etotu su guvernu italianu, in manera prus forte chi in su barigadu, cheret intrare in sas chistiones chi pro Istatutu e Costitutzione pertocant a sa Regione. Pro s’infrastrutura de su gas, sos impiantos de energia birde e su sèberu de sas ghias de sos parcos su Ministru paret chi siat in bidea de si pònnere in mesu.
Est in custu surcu chi andat posta s’arressada a sa lege pro sas àreas idòneas: no b’at cungiadu legislativu de sa Regione chi s’Istadu non potzat iscontzare e torrare a fraigare comente cheret isse. S’autonomia chi fintzas a como b’est istada in Sardigna s’ammustrat semper de prus un’istentu pro sos isulanos, in su mentres chi sos terramannesos faghent su chi lis cumbenit. Sa Pratobello non diat àere tentu un’ostinu mèngius.
Sa Presidente Todde cun sa lege proposta sestaiat làcanas istrintas, in ue sa defensa de s’istòria e de su logu, permitiant de lòmpere a sos famados 6,2 GW chi fiat sa punna decrarada dae su guvernu, dende aficu mescamente a sas zonas giai guastas dae s’indùstria e a sos tretos urbanizados. Insomma, at proadu a amparare sos interessos de sos italianos e de sos sardos in paris, abigende·si però chi est impossìbile. Si sos primos no aiant atzetadu nudda, sos segundos si podiant aunire in una batalla polìtica contra a s’Istadu tzentrale. Como Todde no at prus su sustegnu nen de sa polìtica italiana, nen cussu de sos sardos chi ant firmadu sa Pratobello.
E como sa Presidente est a sa sola, isetende su 20 de martzu.
Gabriele Tanda
Leave a comment