Custu ghennàrgiu s’est abertu cun prus de baranta mìgia litzentziamentos intro de sas aziendas prus ricas de su mundu. Amazon at decraradu chi at a litzentziare degheoto mìgias persones, Microsoft deghe mìgia e Google dòighi mìgia, chi est prus o mancu su ses pro chentu de totu sos chi bi traballant. Sunt nùmeros de assuconu, ma sunt paga cosa, in cunfrontu a sos prus de chentu chimbanta mìgia traballadores chi su setore at pèrdidu in s’annu coladu.
Sa resone de custas dispatzadas est sa crisi chi su setore est colende posca sa pandemia. Cando bi fiat su Covid, difatis, sas aziendas de internet sunt crèschidas in una manera ispantosa, ma como chi s’impèllida de sa serrada est agabbada e fintzas sos bisòngios de sa gente sunt mudados, s’economia informàtica paret in una crisi mala a sanare. Petzi Amazon in su 2022 at pèrdidu su 45% pro chentu de su valore suo e àteras aziendas, comente Meta (in ue b’at Facebook, Instagram e Whatsapp), ant fatu fintzas peus cun su 66% in mancu: milliardos a mìgias furriados in sa Bùscia.
Sa crisi de sas aziendas de s’informàtica est andende a dae in antis in paris cun unu setore chi pariat intro de su benidore, comente sas criptomonedas. A pustis de sa trampa de FXT, sotziedade ghiada dae Sam Bankman-Fried chi at furadu dinari meda, sas criptomonedas ant inghitzadu a pèrdere sa fide de sos chi investint e finamentas issas ant pèrdidu fundos medas in sa Bùscia.
Sa crisi de su setore informàticu non cheret nàrrere sa morte sua, ma una trasformatzione chi galu non si cumprendet si at a èssere manna e de cale genia. Est dàbile chi su panorama chi amus bìvidu in custos annos, dae como a una deghina de annos, potzat cambiare in una manera funguda.
(redatzione)
Leave a comment