Sos trenos in Itàlia lompent a tardu, semper de prus. In Sardigna sos investimentos pro megiorare un’infrastrutura chi est pòbera sunt dae meda chi non suprint. Su setore paret no èssere in sas cunditzione mègius e paret chi non s’at a renèssere a acontzare sos problemas in pagu tempus.
Sos guastos a bennàrgiu sunt istados maicantos e graes, ca ant corfadu sos nodos prus mannos: pro esempru, s’ùndighi a Milanu est brincada sa lìnea elètrica (ca in ie sos trenos andant cun sa currente, non che a inoghe chi andant galu a diesel); su batòrdighi e sa die a pustis, su nodu de Roma at tentu problemas a unu magasinu e a unu tretu de ferrovia.
In Sardigna semus avesos a custas disauras, mescamente in istiu, ma in Terramanna nono, e pro custu gente meda de sas biddas a curtzu a sas tzitades mannas andant in su logu de traballu cun sos trenos. Sa crisi, tando, est divènnida in pagu una chistione econòmica chi est trobogende aziendas e populatzione.
Sa polìtica, e mescamente su Ministru de sas Infrastruturas, Matteo Salvini, paret denegare sos problemas e a s’imbesse est proende a betare sas neghes a inimigos cuados, chi sabotant su sistema pro pesare problemas de immàgine a isse, a FdS e sa natzione. Giaos istichidos in sos filos elètricos, iscrapas betadas in sos cavos e àteras acontèssidas minores acrarint totu sas situatziones. Sa responsabilidade no est sa sua, ma de sos sabotadores.
Sa veridade est un’àtera, però, e, paret istranu, ma non b’intrat de su totu su Ministru. Sas ferrovias ant bìvidu una crèschida manna de sos trenos, ma una menguada de sas ferrovias. A s’inghitzu de sos annos duamìgia, difatis, FdS aiat seberadu de nde bogare carchi lìnea pro minimare sos gastos. Custu at fatu iscumpàrrere lìneas de impreare cando b’at carchi guastu. In prus sos tempus pro annoare istatziones e fraigare tretos noos pro neghe de sa burocratzia sunt longos meda.
Su PNRR no at a dare un’agiudu fundamentale, nen a sa retza italiana, e nemmancu a sa sarda. Salvini si sighit cun cust’iscena est ammustrende chi nemmancu isse at a èssere gasi ùtile pro sorbere custu carraxu.
Gabriele Tanda
Leave a comment